मतदानको पाँच दिनभित्र सबै क्षेत्रको गणना सम्पन्न गर्छौँ : आयोग

काठमाडौं। निर्वाचन आयोगले मंसिर ४ मा हुने प्रतिनिधिसभा र प्रदेशसभा निर्वाचनको मतगणना ३ देखि ५ दिनभित्र सम्पन्ने गरिसक्ने बताएको छ। ५ दिनभित्र सबै क्षेत्रको गणना सम्पन्न गरिसक्ने लक्ष्य आयोगको छ।

आयोगकाअनुसार मतदान सकिएपछि आइतबार साँझ नै सुरक्षाकर्मीको सहयोगमा मतपेटिका निर्वाचन अधिकृतको कार्यालयमा पठाउने कार्यतालिका आयोगको छ। दोस्रो दिन नै सर्वदलीय बै‌ठक बसेर उम्मेदवार मनोनयन गरेको कार्यालयमा उम्मेदवारका प्रतिनिधिसमक्ष मतगणना सुरु हुने आयोगका प्रवक्ता शालिग्राम शर्मा पौडेलले बताए। 

उनकाअनुसार प्रत्यक्ष र समानुपातिक निर्वाचनको मतगणना एकैपटक गर्ने तयारी छ। तर कर्मचारी र मतगणनास्थलको अभाव भएको क्षेत्रमा भने समानुपातिकको मतगणना प्रत्यक्षको गणना सम्पन्न भएपछि हुनेछ।

मंसिर २० गतेसम्म सबै प्रक्रिया सम्पन्न गरी निर्वाचन प्रतिवेदन राष्ट्रपतिसमक्ष पेश गरिने आयोगले जनाएको छ।