प्रत्यक्षतर्फको नतिजा तीन दिनभित्रै सार्वजनिक

काठमाडौं– निर्वाचन आयोगले आगामी आइतबार हुने प्रतिनिधिसभा र प्रदेशसभा सदस्य निर्वाचनको सम्पूर्ण परिणाम पाँच दिनभित्र सार्वजनिक गरिसक्ने जनाएको छ। प्रत्यक्षतर्फको परिणाम तीन दिनभित्र र समानुपातिकतर्फको परिणाम पाँच दिनभित्र सार्वजनिक गर्ने आयोगको भनाइ छ।

प्रमुख आयुक्त दिनेशकुमार थपलियाले भने, ‘सबै मतपेटिका संकलन भएलगत्तै मतगणना सुरु हुनेछ। तीन दिनभित्र प्रत्यक्षतर्फ र त्यसको पाँच दिनभित्र समानुपातिकका सबै मतगणना सक्ने गरी योजना बनाएका छौं।’ २२ मंसिरभित्र चुनावका सबै नतिजाको प्रतिवेदन राष्ट्रपतिसमक्ष बुझाउने तयारी भइरहेको उनले बताए।

प्रतिनिधिसभा र प्रदेशसभा निर्वाचन ४ मंसिरमा  देशभर एकै चरणमा हुँदै छ। चुनावमा १ करोड ७९ लाख ८० हजार ५७० मतदाता रहेका छन्। मतदानका लागि १० हजार ८९२ मतदान स्थल र २२ हजार २२७ मतदान केन्द्र कायम गरिएको छ। ३ मंसिरसम्म १८ वर्ष उमेर पुगेकाले मतदान गर्न पाउनेछन्।