राज्यबाट मधेशका मुद्दा सम्बोधन हुनुपर्छ : अध्यक्ष ठाकुर

महोत्तरी- लोकतान्त्रिक समाजवादी पार्टी (लोसपा) नेपालका राष्ट्रिय अध्यक्ष महन्थ ठाकुरले राज्यबाट सम्बोधन हुन बाँकी मधेशका समस्यालाई आफूले निर्वाचनमा उठान गरेको बताएका छन्।

महोत्तरी–३ प्रतिनिधिसभा सदस्य पदका उम्मेदवार ठाकुरले चुनावी अभियानबीच बिहीबार नागरिकताविहीन अवस्था आउन नदिन आफूले अनवरत प्रयास गरिरहेको बताए।

उनले भने, ‘हामीले संविधान लेखन र घोषणाकै बेलादेखि मधेश मुद्दा सम्बोधन भएन भनेर असहमति राख्दै आएका छौं। यी मुद्दा पूर्ण सम्बोधन नहोउञ्जेल हाम्रो आन्दोलन जारी रहनेछ।’

अध्यक्ष ठाकुरका अनुसार यसअघिको सरकारले नागरिकता समस्या सम्बोधनको प्रयत्न गरेको देखाए पनि यसभित्र कुटिल दलीय अहंकारको प्रवेशले समाधान हुन सकेन। आफ्नो दलले यो समस्या यथाशक्य चाँडो सम्बोधन होस् भन्ने चाहिरहेको उनको भनाइ छ। 

आफूले निर्वाचन अभियानका क्रममा आम मतदाताबाट उच्च समर्थन पाइरहेको हुँदा जीतमा संशय नरहेको उनको भनाइ छ। हालको ५ दलीय सत्ता गठबन्धनका उम्मेदवार ठाकुरका पक्षमा नेपाली कांग्रेस, नेकपा माओवादी केन्द्र र नेकपा एकीकृत समाजवादीले समर्थन जनाएका छन्। 

महोत्तरी–३ मा मंसिर ४ गते सम्पन्न हुने प्रतिनिधिसभा तथा प्रदेशसभा सदस्य निर्वाचन–२०७९ का लागि ९९ हजार ९३० मतदाता छन्। निर्वाचनमा प्रतिनिधि सभाका लागि यस क्षेत्रबाट ३ महिलासहित २१ उम्मेदवार छन्। यसमा स्वतन्त्रको संख्या १० छ।

क्षेत्रभरमा ७८ मतदानस्थलमा १२९ मतदान केन्द्र रहेको जिल्लास्थित मुख्य निर्वाचन अधिकृतको कार्यालय जलेश्वरले जनाएको छ।