सन्दीपको अर्धशतक, भारतलाई १५७ रनको लक्ष्य प्रस्तुत

काठमाडौं-भारतमा जारी चौकोणीय एकदिवसीय क्रिकेट सिरिजको दोस्रो खेलमा नेपालको यू–१९ टोलीले भारतको यू–१९ ए टोलीलाई जितका लागि १५७ रनको लक्ष्य दिएको छ । लखनउमा टस जितेर पहिले ब्याटिङ गरेको नेपालले ४५ ओभर ५ बलमा सबै विकेट गुमाउँदै १५६ रन बनाएको थियो । 

यो भारतका लागि  मध्यम लक्ष्य हो  । नेपालका लागि सन्दीप जोराले सर्वाधिक ६६ रनको अर्धशतकीय इनिङस खेले । यस्तै तृत राज दासले ४६ रन जोड्दा भिम सार्कीले २८ रन जोडे । भारतका अजय देव गड र याई डी माङवानीले ४–४ विकेट लिए  । 

पहिलो खेलमा पराजित भोगेको नेपाल भारतको ए टिमविरुद्ध जित निकाल्ने लक्ष्यसहित मैदान उत्रिएको हो । सिरिज दोस्रो चरणमा पुग्न नेपाललाई यो खेल जित्नै पर्ने दबाब समेत रहेको छ । 

पहिलो खेलमा नेपाल भारतको यू–१९ को ’बि’ टिमसंग ४० रनले पराजित भएको थियो ।