कूटनीतिक नियोगलाई निर्वाचन तयारीबारे ब्रिफिङ

काठमाडौं– निर्वाचन आयोगले आगामी ४ मंसिरमा हुने प्रतिनिधिसभा र प्रदेशसभा सदस्य निर्वाचनबारे नेपालस्थित कूटनीतिक नियोगलाई अवगत गराएको छ। सोमबार आयोगले नेपालस्थित कूटनीतिक नियोगका प्रमुख तथा प्रतिनिधिलाई निर्वाचनबारे जानकारी गराएको हो।

कान्तिपथस्थित आयोग मुख्यालय बहादुर भवनमा आयोजित कार्यक्रममा प्रमुख निर्वाचन आयुक्त दिनेशकुमार थपलियाले प्रतिनिधिसभा र प्रदेशसभा निर्वाचनलाई स्वच्छ, स्वतन्त्र र पारदर्शी ढंगले सम्पन्न गर्न आयोग प्रतिबद्ध रहेको र आवश्यक तयारी पूरा भएको बताए।निर्वाचनलाई सफलतापूर्वक सम्पन्न गर्ने कार्यमा अन्तर्राष्ट्रिय समुदायबाट साथ र सहयोग अपेक्षा गरिएको उनको धारणा छ। 

आयोगका उपसचिव कमल भट्टराईले निर्वाचनका लागि गरिएको सुरक्षा व्यवस्था, आचारसंहिता कार्यान्वयनका लागि गरिएको प्रबन्ध, निर्वाचन अनुगमन गर्ने संस्था तथा पर्यवेक्षकबारे कूटनीतिक नियोगलाई विस्तृत जानकारी गराएका थिए। निर्वाचनमा मतदानपछि सुरक्षा संवेदनशीलताको दृष्टिले महत्त्वपूर्ण मानिएको मतपेटिका सुरक्षाका लागि सुरक्षा निकायको ३ घेरा कायम हुने गरी व्यवस्था मिलाइएको उनले बताए। 

भट्टराईले ३ अन्तर्राष्ट्रिय संस्था, ४४ राष्ट्रिय संस्थालाई निर्वाचन अनुगमन अधिकार दिइएको र निर्वाचनमा ८ हजार पर्यवेक्षण परिचालन गरिएको जानकारी दिए।

कार्यक्रममा विदेशस्थित कूटनीतिक नियोगका प्रतिनिधिले संविधानमा उल्लेख भएअनुसार महिला सहभागिताबारे चासो राखेको आयोगले बताएको छ।