काठमाडौं- बंगलादेशमा जारी साफ च्याम्पियनसिपअन्तर्गत फाइनल प्रवेशका लागि बुधबार नेपाल माल्दिभ्ससंग भिड्दै छ । नेपाली समयअनुसार बुधबार पौने चार बजे हुने खेलमा जीत निकाल्दै नेपाल इतिहास रच्ने दाउमा छ ।
समूह चरणको अन्तिम खेलमा आयोजक बंगलादेशलाई हराउँदै नेपाल सेमिफाइनलमा प्रवेश गरेको हो भने भारतविरुद्ध पराजित हुँदै उपविजेता बनेको माल्दिभ्सले नेपालसँगको भेट पक्का गरेको हो ।
अहिलेसम्म यी दुई टोलीले १५ खेल खेलेका छन् । जसमध्ये नेपालले ४ खेलमा मात्र जित निकाल्न सकेको छ भने ४ खेल बराबरी खेलेको छ । बाँकी ७ खेलमा माल्दिभ्सले बाजी मारेको छ ।
पछिल्लो समय नेपालले बंगबन्धु गोल्डकपमा माल्दिभ्समाथि ४–० को नतिजा निकालेको थियो । नेपालले माल्दिभ्सलाई हराएको त्यही बंगबन्धु राष्ट्रिय रंगशाला हो जहाँ बुधबार पुनः दुवै आमनेसामने हुँदै छन् ।
साफ च्याम्पियनसिप नेपालमा अहिलेसम्म फाइनलमा पुग्न सकेको छैन् । एक पटकको विजेता र तीन पटकको उपविजेतालाई पराजित गर्दै फाइनलमा पुग्नु नेपालका लागि चुनौतीपूर्ण नै मानिएको छ । आजको खेल नेपालले आफ्नो पोल्टामा पार्नका लागि सबैखाले रणनीति प्रयोग गर्ने प्रशिक्षक बालगोपाल महर्जनले बताएका छन् ।
यस्तै समूह ‘ए’को उपविजेता बनेसँगै पाकिस्तानले समूह ‘बी’को विजेता भारतसँग फाइनल प्रवेशका लागि भिड्ने भएको छ ।
प्रकाशित: Dec 31, 2017| 18:23 आइतबार, पुस १६, २०७४