हाइटीको कीर्तिमानी, सिन्ट मार्टेनलाई १३–० ले पराजित

एजेन्सी–कन्काकाफ नेसन्स लिग छनोट अन्तर्गत हाइटी राष्ट्रिय फुटबल टोलीले सिन्ट मार्टेनको राष्ट्रिय टोलीलाई १३–० ले पराजित गर्दै कीर्तिमानी जित दर्ता गरेको छ । पहिलो हाफमा ५–० ले अगाडी रहेको हाइटीले दोस्रो हाफमा ८ गोल गरेको थियो ।

हाइटीको घरेलु मैदानमा भएको खेलमा हाइटीका लागि फरवार्ड डकेन्स नाजोनले ५ गोल गरे । डिफेन्डर अर्केस कार्लेन्सले ११ औं मिनेटमा पहिलो गोल गर्दै सुरु भएको गोलवर्षा अन्तिम मिनेटसम्म चालेको थियो । हाइटीका लागि फ्रान्जी पेरटले दुई गोल थप्दा सोनी मुस्तीभार, हेरोल्ड चार्ल्स, जेफ लुइस र डेरीक एटिएनले १–१ गोल गरे । अर्को एक गोल भने डिआरो फोर्सिथले आत्मघाती गोल गरेका थिए ।

कन्काकाफ नेसन्स लिग छनोटमा ३४ टोलीको सहभागिता रहेको छ । सहभागी टोलीलाई ४ समूहमा विभाजन गरेर ४ चरणको खेल तालिका सार्वजनिक गरिएको छ । 

हाइटीले पहिलो चरणको खेलमा सहज जित निकालेको हो । अर्को खेलमा क्युबाले पनि टर्क्स आइल्यान्डलाई ११–० ले पराजित गर्दै सुखद सुरुआत गर्यो । क्यानाडाले यूएस भर्जिन आइल्यान्डलाई ८–० ले हराउँदा फ्रेन्च गुयानाले एन्गिलालाई ५–० ले पन्छायो । डोमिनिकन रिपब्लिकले पनि बोनाएरलाई ५–० ले नै पराजित गर्यो ।