नारायणी किनारमा यसरी मनाइयो छठ पर्व

भरतपुर- छठ पर्वको महत्वपूर्ण दिन आइतबार साँझ नारायणी किनारमा अस्ताउँदो सूर्यलाई अर्घ्य दिएर पूजाअर्चना गरी मनाइएको छ। सूर्यदेवको अनुष्ठान गरी मनाइने छठपर्व नारायणी किनारमा पनि उल्लासमय तवरले मनाइएको हो। 

छठ मनाउनका लागि नारायणी किनारको सजावट आकर्षक बनाइएको छ। नारायणी किनारमा छठ मनाउने र छठको रमाइलो हेर्न जानेको बाक्लो उपस्थिति देख्न सकिन्थ्यो। 

नारायणी किनारमा तराई सामुदायिक सेवा केन्द्रले छठ पूजा व्यवस्थापन गर्दै आएको छ। भक्तजनको चापलाई मध्यनजर गर्दै नारायणी नदीमा नुहाउन र अर्क चढाउनका लागि विशेष व्यवस्थापन गरेको समितिका सचिव नारद परिहस्तले बताए। 

छठमा पछिल्लो समय पहाडी समुदाय र युवा पुस्ताको बढी आकर्षण रहेको उनले बताए। आइतबार मात्रै करिब १० हजार जना छठ पर्वमा सहभागी भएको उनले दाबी गरे। भरतपुर १० बाट पहिलोपटक छठ पूजा गर्न आएकी भोलादेवी कुँवर चोखो खाएर अर्घ्य दिन आएको बताइन्। 

‘युट्युब टिकटिकमा सबैले छठ पूजाको बारेमा राखेको देखेर पहिलोपटक पूजा गर्न आएकी हुँ,’उनले भनिन्। नेपालीहरुको ठूला पर्व दसैं तिहार सकिएसँगै छठमा हुने भिन्नै किसिमको रौनकले आफूलाई आर्कर्षित गरेको उनले सुनाइन्।

११ वर्षदेखिे व्रत बस्दै आएकी माडीकी निलम चौधरी छठ पर्वको विशेष महिमा रहेको बताउँछिन्। ‘मेरो बाबु जब बिरामी परेको थियो जब मैले छठीमैँयासँग भने निको बनाइदिनुस। छठीमैँया कृपालु हुनुहुन्छ त्यहीँ समयदेखि छठ पूजा गर्दै आएकी छु,’ उनले भनिन्। 

छठको पूजा गर्दा उँखु, केराको बोट, बेसार, अदुवा, नरिवल, जौ, भुसुवा, ठकुवा, फलफुल, वतासाजन्य मिठाई जस्ता सामाग्रीहरु आवश्यक पर्ने उनले बताइन्। चितवनमा नारायणगढ नारायणी किनारमा मात्रै नभएर पदमपुरको खगेरी खोलामा, माडी, पर्साजस्ता ठाउँका जलाशयहरुमा पनि छठ मनाउनेहरुको भिडभाड हुने गरेको छ। सोमबार बिहान उदाउँदो सूर्यलाई अर्घ्य दिएपछि छठको समापन हुने गर्दछ।