आसिफ शेषले यु १९ को कप्तानी पाएपछि वीरगंजमा खुशियाली

वीरगंज- भारत भ्रमणमा जाने यु १९ राष्ट्रिय क्रिकेट टोलीको नेतृत्व यहाँका यूवा महम्मद आसिफ शेषले गर्ने भएपछि गृहनगरमा खुशियाली छाएको छ । क्रिकेटमा राष्ट्रिय टोलीको कप्तानीको कमान सम्हाल्ने अवसर पाएका उनी नेपाली क्रिकेट इतिहासमै वीरगंजको पहिलो खेलाडी हुन् ।
 
यसअघि छिमेकी बारा जिल्ला सदरमुकाम कलैयाका पवन अग्रवाल र विनोद दासले राष्ट्रिय टोलीको नेतृत्व गरेपनि आँगनमै क्रिकेट मैदान भएको वीरगंजका खेलाडीका लागी अवसर जुरेको थिएन ।

भारतमा ११ सेप्टेम्बरदेखि नेपाल,भारत,अफगानिस्तान, भारतकै नेशनल क्रिकेट एकेडेमी सहितको टोलीबीच मैत्रीपूर्ण लिग क्रिकेट हुँदैछ । सन २०१२ देखि नै उमेर समूहको क्रिकेटमा राष्ट्रिय टोलीबाट सहभागी भएका उनले पहिलो पटक कप्तानी सम्हाल्दैछन् । आसिफ विकेट किपर र शुरूवाती ब्याट्सम्यानका रूपमा खेल्दै आएका छन् ।

ठूलो सपना साकार भएको छ, आसिफका बुवा महम्मद सलाम शेषले भावुक हुँदै नेपाल समयसँग भने, दुःखजिलो गरेर छोराहरूलार्इ सक्दो अगाडी बढाउने कोशिश गरे, आज भगवानले पनि सुने । राष्ट्रिय क्रिकेटमा शेष ब्रदर्स भनेर चिनिएको राष्ट्रिय क्रिकेट खेलाडीद्व महम्मद आरिफ र आसिफ उनको छोरा हुन् । स्कूले उमेरमै टोलकै चौरमा पहिलो पटक ब्याट समात्दा टाउकोमा बलले नराम्ररी चोट लागेपछि कहिल्यै ब्याट नसमातेका सलामले छोराहरूको क्रिकेट खेलप्रतिको लगावलार्इ प्रारम्भदेखि नै हौंस्याए ।

क्रिकेटको सामाग्री हाम्रो लागी महगो नै थियो,ट्रयाक्टर टेलरको वर्कसप संचालन गर्दै आएका उनले विगत सम्झदै भने,घरको आवश्यक्ताहरूलार्इ थाती राखेरै भएपनि छोराहरूलार्इ खेल्ने सामाग्री जुटाउने कोशिश गरे ।

स्थानीय विद्यासदन स्कूलमा दुबै खेलाडीलार्इ पढाउने मात्र नभएर खेल मैदानमा थपडी बजाएर हौंस्याएका प्रधानाध्यापक लालबहादुर गुरूगंले,चेलाले अवसर पाउँदा गुरूलार्इ गर्वको अनुभूती हुनु स्वाभाविक भएको प्रतिकृया दिए । उनीहरूको लगन देखेर खुशी लाग्थ्यो, प्रधानाध्यापक गुरूगंले भने, स्कूलको प्रशिक्षक जहुर अंसारीको पनि ठूलो योगदान छ, आफूले क्रिकेट खेलमा देखेको सपना उनले सानानानीहरूलार्इ अघि बढाएर पुरा गर्दैछन् । 

स्कूल स्तरिय क्रिकेटबाट नै राम्रा खेलाडीको पहिचान हुने भएकोले वीरगंजबाट आसिफ, आरिफ जस्ता उम्दा खेलाडीको उत्पादन हुनुमा विद्यासदन स्कूलको महत्वपूर्ण योगदान रहेको छ । पर्सा क्रिकेट संघका अध्यक्ष महम्द दाउद अंसारी भन्छन्, उमेर समूहको क्रिकेट खेलमा विद्यासदनका खेलाडीको तुलना अरूसँग गर्न सकिन्न ।

७ वर्षको उमेरदेखि नै क्रिकेट खेल्न थालेको हो, क्यान प्रदेश २ का प्रशिक्षक प्रकाश शर्माले प्रशिक्षण शिविरको नियमित समय सकिएपनि दुबै दाजुभार्इले अतिरिक्त समय खेल अभ्यास गराउन कर लगाउने गरेको बताए । उनले भने, अरू खेलाडीहरू क्याम्पको समय सकिएपछि विश्राम गर्न जान्थे तर यी दुबै दाजुभार्इले अतिरिक्त समय पनि खेल सिक्ने धैर्यता हुन्थ्यो ।

मैत्रीपूर्ण भएपनि यो टुर्नामेन्ट जस्तै हो, आसिफले भ्रमणको तयारीबारे प्रतिकृया दिंदै भने, हाम्रो टीम यंग छ, उत्साह भरपूर छ । राम्रा टीमसँग खेल्न पाउँदा धेरै सिक्ने अवसर पाइन्छ । आफ्नो खेल कुन स्तरको छ भन्ने जाँच्ने मौका पनि हो । आसिफ नेतृत्वमा नेपाली टोली सोमबार भारत भ्रमणका लागी प्रस्थान गर्नेछ । आसिफसँगै प्रदेश २ को वीरगंजबाट पेस बलर रासिद खान, कलैयाबाट पवन सर्राफ, ट्रिट राज दास, निखिल सिंह, रवि साह १५ सदस्यीय टोलीमा अटाएका छन् ।

नेपालको पहिलो खेल एनसीएसँग १२ सेप्टेम्बरमा, दोश्रो खेल १४ सेप्टेम्बरमा भारतीय टोलीसँग र तेश्रो खेल १६ सेप्टेम्बरमा अफगानी टोलीसँग हुनेछ ।