साफ च्याम्पियनसिप : नेपालले आज बंगलादेशको सामना गर्दै

काठमाडौं-नेपालले आज (शनिबार) समूह चरणको अन्तिम खेलमा घरेलु टोली बंगलादेशसँग खेल्दैछ । नेपालले समूह चरणको आफ्नो अन्तिम खेल आयोजक राष्ट्र बंगलादेशसँग खेल्दै छ । खेल बंगबन्धु स्टेडियममा नेपाली समयअनुसार साँझ ६:४५ बजेपछि शुरु हुनेछ ।

नेपाल र बंगलादेशले खेल्नुअघि भुटान र पाकिस्तानले सोही मैदानमा प्रतिस्पर्धा गर्दैछ । समूह ‘ए’ मा चारै टोलीको सेमिफाइनल प्रवेश गर्ने गणितीय सम्भावना बाँकी रहँदा पहिलो खेल सबै टोलीको लागि निकै महत्वपूर्ण छ ।

गोल अन्तरका आधारमा दुई टोलीले अन्तिम चारमा स्थान बनाउने हुदा पहिलो खेलले नै दुई टोलीको टुङ्गो लगाउनेछ । पहिलो खेलमा पाकिस्तानले भुटानमाथि जित हात पारे पाकिस्तानको अघि बढ्ने सम्भावना बलियो हुनेछ । भुटानसँग पाकिस्तान पराजित भएको खन्डमा नेपाल र बंगलादेशले बराबरी खेले दुवै टोलीले अन्तिम चारमा स्थान बनाउनेछन् । बंगलादेशमाथिको जितले नेपालले अन्तिम चारमा स्थान पक्का गर्नेछ ।

बंगलादेशमा पराजित भएको खन्डमा नेपालको यात्रा गोलअन्तरमा नै भर पर्नेछ । जारी प्रतियोगिताको प्रदर्शन हेर्ने हो भने घरेलु टोली बंगलादेशलाई पराजित गर्न नेपाललाई निकै गाह्रो हुनेछ । बंगलादेशले समूह चरणमा शतप्रतिशत जित निकालेकाले पनि बंगलादेशलाई पराजित गर्न त्यति सहज हुनेछैन । बंगलादेशको बलियो डिफेन्स, छरितो मिडफिल्ड र आक्रमक फरवार्डलाई रोक्न नेपाललाई मुस्किल हुनेछ । टोपु बरमान, विप्लो अहमद, मेहबुबुर रहमान लगायतका खेलाडीलाई रोक्न नेपालको लागि चुनौतिपूर्ण हुनेछ ।

यता, नेपालले समूह चरणको पहिलो खेलमा राम्रो खेल्दा खेल्दैपनि पाकिस्तानसँग अन्तिम समयमा गोल खादै पारजित हुन पुगेको थियो । भुटानविरुद्धको दोस्रो खेलमा अघिल्लो खेलको कमजोरी सुधार गरेर खेल्दा नेपालले भुटानमाथि ४–० को सहज जित निकाल्न सफल भयो । नेपालले भुटानविरुद्धको खेलमा सबै पक्षमा चुस्त प्रर्दशन गरेको थियो । त्यही खेललाई निरन्तरता दिने सके नेपालले भुटानलाई पराजित गर्न सक्ने क्षमता राख्दछ ।