चितवन–१ : ह्याट्रिक गर्ने दाउमा पाण्डे, गठबन्धनको भरमा पौडेल

भरतपुर– आगामी मंसिर ४ गते हुने निर्वाचनमा चितवनको क्षेत्र नम्बर १ मा सत्ता गठबन्धन र नेकपा एमालेका उम्मेदवारबीच मुख्य प्रतिस्पर्धा हुने भएको छ। सत्ता गठबन्धनको तर्फबाट उम्मेदवार बनेका कांग्रेसका डा. विश्व पौडेल र नेकपा एमालेका उपाध्यक्ष समेत रहेका सुरेन्द्र पाण्डे दुवै यसपालिको निर्वाचनमा नयाँ रेकर्ड बनाउने दाउमा छन्। 

राष्ट्रिय योजना आयोगबाट राजीनामा दिएर पहिलोपटक संसदीय निर्वाचनमा होमिएका पौडेलको ध्येय पहिलो प्रयासमै जित निकाल्नु छ भने यही क्षेत्रबाट दुई पटकसम्म चुनाव लडेर अर्थमन्त्री भइसकेका पाण्डे ‘ह्याट्रिक’ गर्ने दाउमा छन्। अर्थशास्त्र र अर्थतन्त्रका विज्ञको रुपमा चिनिएका यी दुई प्रतिस्पर्धीबीचको यो पटकको चुनावी लडाइँ थप रोचक हुने देखिएको छ। सत्ता गठबन्धनको समर्थनमा उम्मेदवारी दिएका पौडेललाई जित निकाल्न गठबन्धनको भर छ। तर  गठबन्धनविरुद्ध कांग्रेसकै पुराना नेता राजेन्द्र बुर्लाकोटीले बागी उम्मेदवारी दिएपछि मत काटिने डर पनि उत्तिकै छँदैछ।  

यता २०७४ मा बाम गठबन्धनबाट सहज जित निकालेका सुरेन्द्र पाण्डेलाई गठबन्धनसँगको टकराव अहिले उत्तिकै चु्नौतीपूर्ण छ। गत वैशाख ३० गते सम्पन्न स्थानीय निर्वाचनमा चितवन –१ मा रहेका तीन पालिकाको नेतृत्वमा गठबन्धनले बाजी मारेपछि पाण्डेलाई यो पालि सहज जित निकाल्न गाह्रो देखिएको हो। २०७४ को प्रतिनिधिसभा निर्वाचनमा चितवन क्षेत्र नम्बर १ मा वाम गठबन्धनका उम्मेदवार रहेका पाण्डेले कांग्रेसका राजेन्द्र बुर्लाकोटीलाई १५ हजार ७२० मतान्तरले पराजित गरेका थिए। पाण्डेले ५१ हजार ८० मत पाउँदा बुर्लाकोटीले ३५ हजार ३६० मत पाएका थिए।

रत्नगरमा गत स्थानीय निर्वाचनमा कांग्रेसका प्रल्हाद सापकोटाले एमालेकी बिमला देवी दुवाडीलाई पराजित गरेका थिए। प्रल्हादले २० हजार ७९६ मत ल्याउँदा दुवाडीले १२ हजार ७२८ मत ल्याएकी थिइन्। यस्तै खैरहनी नगरपालिकामा पनि कांग्रेसका शशी कुमार खनियाँले एमालेका लालमणि चौधरीलाई पराजित गरेका थिए। खनियाले १४ हजार ५४५ मत ल्याउँदा चौधरीले १३ हजार ६९५ मत ल्याएका थिए। उता राप्ती नगरपालिकामा नेकपा एकीकृत समाजवादीका शमशेर लामाले एमालेका गोविन्द प्रसाद कँडेललाई पराजित गर्दै जित निकालेका थिए। लामाले १२ हजार ५२४ मत ल्याउँदा कँडेलले १२०५९ मत ल्याएका थिए।

यस्तै यी तीन पालिकाको वडाध्यक्षको मतलाई हेर्दा राप्तीमा एमाले र खैरहनी र रत्ननगरमा कांग्रेस अगाडि  देखिन्छ। राप्तीमा एमालेका वडाध्यक्षको मत र गठबन्धनको भन्दा एक हजार एक सय ३३ ले बढी छ। एमालेका वडाध्यक्षहरुको मत १२ हजार ९७८ छ भने गठबन्धनको ११ हजार ८४५ रहेको छ।

खैरहनीमा भने गठबन्धनको मत एमालेभन्दा ३४१ मतले गठबन्धन अगाडि छ। गठबन्धनका वडाध्यक्षले १३ हजार ७८८ मत पाउँदा एमालेले १३ हजार ४४७ मत पाएको छ। यता रत्ननगरमा भने वडाध्यक्षको मत हेर्दा गठबन्धनको भन्दा एमाले कमजोर देखिन्छ। गठबन्धनका वडाध्यक्षले २० हजार ७८५ मत पाउँदा एमालेका वडाध्यक्षले  १३ हजार १८१ मत मात्रै पाएका छन्।

आगामी मंसिर ४ गते हुने प्रतिनिधिसभा सदस्य निर्वाचनमा सत्तारुढ गठबन्धनका साझा उम्मेदवार पौडेल गत स्थानीय निर्वाचनले नै यो क्षेत्रमा नयाँ अनुहारले जित्ने छनक दिइसकेको दाबी गर्छन्। उनले एमालेका उम्मेदवार सुरेन्द्र पाण्डेलाई १० वर्षसम्म जनताले परीक्षणको मौका दिए पनि ‘पर्फमेन्स’ राम्रो नभएकै कारण यो पटक जनताले आफूलाई जिताउने उनले दाबी गरे। ‘१० वर्षसम्म गरेको कामको जनताले मूल्यांकन गरेका छन्। उहाँले पटक–पटक जितेर के नै नयाँ कुरा गर्नुभयो र? मैले गएको एक वर्षमा योजना आयोगमा हुँदा गरेको कामको मूल्यांकन जनताले पक्कै गर्नुहुनेछ र भविष्य हेरेर पनि उहाँहरुले जिताउनुहुनेछ,’ उनले भने।

नेकपा एमालेका उम्मेदवार पाण्डेले भने जनताले आफ्नो पहलमा विकास निर्माणका काम धेरै भएका र अधूरो तथा अपूरो कामहरु फेरि पूरा गर्न जनताले जिताउने दाबी गरे। ‘यो क्षेत्रमा विकास निर्माणका काम धेरै भएका छन् अब केही अपूरा कामहरु पूरा गर्ने मेरो एजेन्डा छ। हिजो म चुनाव लड्दा सानो टुक्रा हाइवेको वरिपरी पनि पिच थिएन। अब अधिकांश ठाउँमा बाटो कालोपत्रे भएको छ। अब सानो सानो बाटोको कामबाहेक गेमचेन्जर ठूला परियोजना पूरा गर्नुपर्नेछ,’ उनले भने।  

यता सत्ता गठबन्धनका उम्मेदवार पौडेल भने बागी उम्मेदवारले आफूलाई फरक नपर्ने बताउँछन्। ‘हाम्रो पार्टीमा सुरुवाती चरणमा केही असन्तुष्टि देखिए पनि काम गर्दै अगाडि बढ्दै जाँदा उहाँको पनि उचित व्यवस्थापन गर्ने कोसिस गर्नेछौं। नभए पनि प्रतिनिधिसभाको गठबन्धनको आधिकारीक उम्मेदवार म नै हुँ। जनताले रुख चिन्हमा भोट हालेर मलाई जिताउनेछन्,’ उनले भने।