आगामी निर्वाचनमा भाग लिन ८६ दल दर्ता, ५७ दलको मात्र प्रत्यक्षमा उम्मेदवारी

काठमाडौं– निर्वाचन आयोगमा आगामी ४ मंसिरमा हुने प्रतिनिधिसभा र प्रदेशसभा निर्वाचनमा भाग लिने प्रयोजनका लागि ८६ दल दर्ता भए पनि ५७ दलले मात्र प्रत्यक्षतर्फ उम्मेदवारी दिएका छन्। प्रतिनिधिसभातर्फ ५७ दलले उम्मेदवारी दिएको आयोगले बताएको हो।

प्रदेशसभातर्फ भने प्रत्येक प्रदेशमा प्रत्यक्षतर्फ उम्मेदवारी दिने दलको संख्या फरक छ। प्रदेश १ मा ३०, मधेसमा ३७, बागमतीमा ३२, गण्डकीमा २३, लुम्बिनीमा २५, कर्णालीमा १६ र सुदूरपश्चिममा २० दलले प्रदेशसभातर्फ प्रत्यक्षतर्फ उम्मेदवारी दिएका छन्। 

आयोगमा दर्ता भएका दलको संख्या भने ११६ रहेको सहायक प्रवक्ता सूर्यप्रसाद अर्यालले बताए। दर्ता भएका सबै दलले आगामी निर्वाचनमा भाग नलिने उनको भनाइ छ। २०७४ को निर्वाचनमा प्रत्यक्षतर्फ ५५ दलले भाग लिएका थिए।

प्रतिनिधिसभा र प्रदेशसभा निर्वाचनका लागि आगामी ३ मंसिरमा १८ वर्ष पूरा हुनेले मतदान गर्न पाउनेछन्। त्यसका लागि मतदातासँग परिचयपत्र हुन आवश्यक छ।

आगामी ३ मंसिरसम्म १८ वर्ष पूरा हुनेसमेत १ करोड ७९ लाख ८८ हजार ५७० जनाले मतदान गर्न पाउने आयोगले जनाएको छ। यीमध्ये ९१ लाख ४० हजार ८०६ पुरुष, ८८ लाख ४७ हजार ५७९ महिला र १८५ अन्य मतदाता छन्।