भूटानविरूद्ध नेपालको पहिलो गोल

काठमाडौं-साफ च्याम्पियनसिप अन्तर्गतको बिहीबारको खेलमा नेपालले अग्रता लिएको छ । भुटानविरूद्धको खेलको २१ औ मिनेटमा नेपालले पहिलो गोल गरेको छ । कर्नर किकबाट आएको बललार्इ सदुपयोग गर्दै अनन्त तामाङले भुटान विरूद्ध पहिलो गोल गरेका छन् ।

ढाकाको बङ्गबन्धु नेशनल स्टेडियममा जारी खेलमा दुबैटोली जितको खोजीमा छन् । राष्ट्रिय टोलीका लागि अनन्तको यो दोस्रो गोल हो । उनले एएफसी सोलिडारिटी कपमा लाउसविरुद्ध २-२ को बराबरीमा १ गोल गरेका थिए । 

समूह ‘ए’ मा रहेको नेपाल र भुटानले पहिलो खेल गुमाएका कारण अघिल्लो चरण प्रवेशका लागि आज दुवै टोलीलाई जित्नै पर्ने दबाब छ । साफ च्याम्पियनसिपमा पहिलो उपाधि जित्ने लक्ष्यसाथ बंगलादेश पुगेको नेपाली टोली मंगलबार पहिलो खेलमा पाकिस्तानसँग पराजित भएको थियो । 

रक्षापंक्तिले गरेको गल्तीका कारण पाकिस्तानविरुद्ध २-१ को नतिजा बेहोरेको नेपाललाई सेमिफाइनलमा स्थान बनाउन अबका दुवै खेल जित्नैपर्ने हुन्छ। 

भारतसँग २-० को नतिजा सुम्पिएपछि भुटान पनि ठीक नेपालको जस्तै अवस्थामा छ। नेपालका मुख्य प्रशिक्षक बालगोपाल महर्जन पनि जितको विकल्प नरहेको स्विकार्छन्। आजको खेलमा जीत निकाल्ने संकल्पका साथ खेलाडीहरु मैदान छिर्ने उनको भनाइ छ ।