ओलीको अहंकारले एमालेमा विद्रोह

काठमाडौं- २०७४ को संघ र प्रदेशसभा निर्वाचनमा नेकपा माओवादी केन्द्रसँग तालमेल गर्दै देशको सबैभन्दा ठूलो शक्ति बनेको नेकपा एमाले अहिले विभाजनको सिकार बनिरहेको छ। २०७४ को निर्वाचनमा माओवादीसँगको तालमेलले सकारात्मक परिणाम ल्याएपछि दुवै पार्टी मिलेर नेपाल कम्युनिस्ट पार्टी (नेकपा) बन्‍यो। नेकपामा दुई अध्यक्ष हुने व्यवस्था गरियो, जसका एक अध्यक्ष केपी शर्मा ओलीलाई प्रधानमन्त्री बनाइयो।

करिब दुई तिहाइ नजिकको सरकारका प्रधानमन्त्री र देशको 'सर्वशक्तिमान' पार्टी नेकपाका अध्यक्ष ओलीको अहंकारको धरहरा चुलिँदै गयो। उनले अरु राजनीतिक दलहरुलाई देख्‍न छोडे, आफूले गरेका गलत कदमको विरोध गर्नेलाई 'ठेगान लगाउने' रणनीति अंगाले र अधिनायकवादी चरित्र प्रस्तुत गरे, जुन धेरै दिन टिक्‍न सकेन। 

संसद्‌को एक कार्यकाल पूरा हुन करिब डेढ वर्ष बाँकी रहँदै ओलीले संसद्‌को असंवैधानिक विघटन गरे। एक पटक होइन, दुई-दुई पटक। पार्टीभित्रै उनको चर्को विरोध भयो। विरोधीलाई पाखा लगाउने रणनीति जबरजस्त रुपमा अँगाल्दै गए। अन्तत: सत्ताबाट बाहिरिनुपर्‍यो।

पार्टी विवाद चुलिएर नेकपा तीन टुक्रामा विभक्त हुनुपर्‍यो- नेकपा एमाले, नेकपा माओवादी र नेकपा एकीकृत समाजवादी। तर, ओलीको अभिमानको चुचुरो भने ढलेन। अहिले फेरि एमालेभित्रै विद्रोहको लहर सुरु भएको छ। उनी पार्टीको १० औं महाधिवेशनबाट नै आफूविरुद्ध उभिएकाहरुलाई कर्के आँखाले पनि हेर्न नसक्ने अवस्थामा पुगे। जसको परिणाम २०७९ वैशाख ३० मा भएको स्थानीय तहको निर्वाचनको परिणामले एमालेलाई दोस्रो दल बनाइदियो।