एमाले-लोसपा चुनावी गठबन्धन : वार्ता समितिले सहमति नजुटाएपछि ओली-महन्थबीच छलफल

काठमाडौं- नेकपा एमाले र लोकतान्त्रिक समाजवादी पार्टीबीच आगामी ४ मंसिरको चुनावका लागि गठबन्धन गरी सिट बाँडफाँट गर्न गठित वार्ता समिति सहमतिमा पुग्न असफल भएको छ। 

वार्ता समिति र एमाले शीर्ष नेताबीच तीनसम्म चलेको वार्तामा कुरा नमिलेपछि एमाले अध्यक्ष केपी ओली र लोसपा अध्यक्ष महन्थ ठाकुरबीच छलफल भएको छ। 

आगामी चुनावमा सिट बाँडफाँटको  विषय टुंग्याउन दुवै नेताबीच छलफल भएको लोसपाले बताएको हो।

एमाले र लोसपाबीच गठबन्धन हुने/नहुने विषयमा ठाकुरले ओलीसँग छलफल गर्नेछन्। दुई दलबीच भएको छलफलमा एमालेले चुनावी गठबन्धन विषयमा त्यति चासो नदेखाएको वार्तामा सहभागी एक नेताले बताए।

मधेसमा शीर्ष नेताहरूले नै पार्टीमा प्रवेश गर्न थालेपछि एमालेले चुनावी गठबन्धनका लागि त्यति चासो नदेखाएको लोसपाका एक नेताको भनाइ छ।

जसपाले मधेस प्रदेशमा १९ सिट माग गरेकामा एमालेले सहमति जनाएको छैन। एमालेले लोसपालाई १० सिट मात्र दिन चाहेको बताइएको छ।