नेपालको खराब प्रदर्शन : ५८ रन बनाउँदा ७ विकेट गुम्यो  

काठमाडौं- एसिया कप छनोटका लागि भइरहेको खेलमा हङकङविरुद्ध नेपालले खराब प्रदर्शन गरेको छ । पहिलो ओभरमै ओपनर सुवास खकुरेललाई शुन्य रनमा गुमाएकाे नेपालले अत्यन्तै कमजोर प्रदर्शन गरिरहेको छ ।    

सुरुवात नै खराब गरेको नेपालले ३३ ओभर खेल्दा ७ विकेट गुमाएर ८१ रन बनाएको छ । ८ ओभरमा २३ रन बनाउदा नेपालको दोस्रो विकेट झरेको थियो । कप्तान पारस खड्का १४ रन बनाए आउट भएका हुन् । 

यस्तै १५ ओभर ५ बलमा ४४ रन बनाउदा नेपालले तस्रो विकेट गुमाएको छ । तेस्रो विकेटका रुपमा अनिल शाह आउट भए । उनी ४२ बल खेल्दै १५ रन जोडेर आउट भए । 

यसैगरि चौथो विकेटका रुपमा १२ रन बनाएर ज्ञानेन्द्र मल्ल आउट भए । १६ ओभर ३ बलमा नेपालले ४७ रन जोड्दा उनी आउट भएका हुन् । यस्तै दिपेन्द्रसिंह ऐरि २ रनमा आउट भए । नेपालले १७ ओभर ४ बल खेल्दै ५३ रन जोड्दा उनी आउट भएका हुन् ।

नेपालले २० ओभर ४ बल खेल्दा छैटौँ विकेट गुमाएको छ । ९ बल खेल्दै ७ रन बनाएर सागर पुन आउट भएका हुन् । २३ ओभर ५ बल खेल्दा नेपालले ७ विकेट गुमाएको छ । नेपालले ५८ रन बनाउँदा सोमपाल कामी सातौ विकेटका रुपमा शुन्य रन बनाएर आउट भएका हुन् ।

गति समाउन नसक्दा नेपालको खेल अत्यन्तै कमजोर देखिएको छ । शीर्ष दुईमा पर्न नेपालले हङकङलाई भारी अन्तरले हराउनुका साथै ओमानले यूएईलाई पनि त्यसरी नै हराउनुपर्छ ।

सहभागी ६ मध्ये आयोजक मलेसिया र सिंगापुर फाइनल होडबाट बाहिरिइसकेका छन्। बाँकी चार टिम फाइनल पुग्ने सम्भावना कायमै छ । तर कुनै पनि टिमले फाइनलमा स्थान सुरक्षित गरिसकेका छैनन्।