शेखर समूहले माग्यो सम्मानजनक सिट

काठमाडौं– नेपाली कांग्रेसको संस्थापन इतर समूहको बैठकले आगामी ४ मंसिरको चुनावमा सम्मानजनक सिट पाउनुपर्ने अडान लिएको छ। शनिबार काठमाडौंको ठमेलस्थित एक होटलमा बसेको नेता शेखर कोइराला समूहको बैठकमा सहभागीले यस्तो माग गरेका हुन्।

आउँदो चुनावको रणनीति तय गर्न बैठक बसेको हो। बैठकमा सहभागी नेताहरूले कांग्रेसले जित्न सक्ने क्षेत्र अन्य पार्टीलाई दिइए गठबन्धन असफल हुने बताए।

बैठकमा सहभागी उद्योग, वाणिज्य तथा आपूर्तिमन्त्री दिलेन्द्रप्रसाद बडुले शेखर–गगन समूहका मान्छे जहाँ छन्, त्यहाँ गठबन्धनका नाममा अन्य दललाई टिकट दिने आशंका रहेको दाबी गरे। 

पार्टी सभापति एवं प्रधानमन्त्री शेरबहादुर देउवाले आफूहरूका माग सम्बोधन नगरे आउँदो चुनावमा रुखमा बाहेक अन्य चिह्नमा भोट नदिने निर्णयसमेत हुन सक्ने बैठकमा सहभागीले केही नेताले बताए।

बैठकमा शेखर समूहका पदाधिकारी, केन्द्रीय सदस्य, सोही समूहबाट पदाधिकारीमा पराजित, प्रदेशसभापतिलगायत उपस्थित छन्। बैठकमा सहभागी विकास लामा र तेजुलाल चौधरीले शेरबहादुर देउवाले न्याय नगर्ने दाबी गर्दै आफ्नो समूहले ४० प्रतिशत भाग लिनुपर्ने माग गरे।