नवौं राष्ट्रिय खेलकुदको पहिलो स्वर्ण पुलिस क्लबलाई

काठमाडौं- नवौं राष्ट्रिय खेलकुदको पहिलो स्वर्ण विभागीय टोली नेपाल पुलिस क्लबले हात पारेको छ। कीर्तिपुरस्थित त्रिवि मैदानमा शुक्रबार भएको फाइनलमा त्रिभुवन आर्मी क्लबलाई ८ विकेटले पराजित गर्दै पुलिसले स्वर्ण जितेको हो।

त्रिभुवन आर्मी क्लबले दिएको १२४ रनको लक्ष्य पुलिसले ६ ओभर ५ बलमा २ विकेट गुमाएर पूरा गरेको हो। पुलिसका लागि कुशल भुर्तेलले १९ बलमा ३ चौका र ६ छक्काको मद्दतले ५१ रनको अर्धशतकीय ईनिङ खेले। सुनिल धमलाले १७ बलमा २ चौका र ४ छक्काको मद्दतले ४२ रन बनाए।

आर्मीका लागि जितेन्द्र मुखिया र सुसन भारीले समान १/१ विकेट लिए। त्यसअघि पहिला ब्याटिङ गरेको आर्मीले ८ ओभरमा ७ विकेट गुमाउँदै १ सय ३ रन बनाएको थियो। वर्षाको कारण खेल ८ ओभरमा झारिएको थियो।

पुलिसका लागि ललित राजवंशी तथा गुल्सन झाले समान २/२ तथा कप्तान दीपेन्द्र सिंह ऐरी र रशिद खानले समान १/१ विकेट लिए।

यस जितसँगै पुलिसले आर्मीसँग समूह चरणमा व्यहोरेको हारको बदला लिएको छ। पुलिसले नवौंमा पहिलो स्वर्ण समेत जितेको छ।

फाइनल गुमाएपछि आर्मीले भने रजत पदकमा चित्त बुझाएको छ।

प्रतियोगितामा सुदुरपश्चिम प्रदेशले कास्य पदक जितेको छ। गण्डकी प्रदेशमा आयोजना हुने नवौं राष्ट्रिय खेलकुद असोज २८ देखि कात्तिक ३ सम्म आयोजना हुनेछ। तर, पुरुष क्रिकेट भने अगाडि नै आयोजना भएको हो।

प्रतियोगितामा तीन विभागिय, सात प्रदेश तथा एनआरएनको टोली गरी ११ टोलीको सहभागी हुनेछन्।