साफमा सहभागी फुटबलरले पाँच लाख पाउने

काठमाडौं-अखिल नेपाल फुटबल संघ (एन्फा) ले साफ च्याम्पियनसिप टोलीका सबै खेलाडीलाई साफ च्याम्पियनसिप जिते जनही पाँच लाख रुपैयाँ दिने घोषणा गरेको छ । 

नेपाली टोली साफ च्याम्पियनसिपमा सहभागिता जनाउन आजै (आइतबार) त्यसतर्फ प्रस्थान गर्दैछ । सातदोबाटोस्थित एन्फा कम्प्लेक्समा आयोजित बिदाइ कार्यक्रममा उपाधि जिते ५-५ लाख रुपैयाँ दिने घोषणा गरिएको हो ।

नेपालले प्रतियोगिताको उद्घाटन खेलमा पाकिस्तानसँग १९ भदौमा बंगबन्धु स्टेडियममा खेल्नेछ । त्यसपछि नेपालले २१ भदौमा भुटानको तथा २३ भदौमा आयोजक बंगलादेशको सामना गर्नेछ । नेपाल साफ च्याम्पियनसिपको सेमिफाइनलभन्दा अघि बढ्न सकेको छैन ।

हरेक समूहका शीर्ष दुई टोलीले सेमिफाइनलमा स्थान बनाउनेछन् । खेलाडीहरुमा किरण चेम्जोङ, विकेश कुथु, एलेन न्यौपाने, दीनेश राजवंशी, देवेन्द्र तामाङ, विराज महर्जन (कप्तान), अनन्त तामाङ, आदित्य चौधरी, रोहित चन्द, सुमन अर्याल, हेमन्त थापामगर, हेमन गुरुङ, विशाल रार्ई, सुनिल बल, सुजल श्रेष्ठ, निराजन खड्का, भरत खवास, विमल घर्तीमगर, नवयुग श्रेष्ठ, अन्जन विष्ट रहेका छन् ।