पल शाहविरुद्धको मुद्दाको पेसी बुधबार

काठमाडौं– जिल्ला अदालत तनहुँले अभिनेता पल शाहविरुद्धको मुद्दाको पेसी भोलि बुधबारलाई तोकेको छ। बुधबारको पेसीमा हुने थुनछेक बहसपछि अदालतले शाहलाई थुनामुक्त गर्ने वा थुनामै राख्नेमध्ये एक आदेश दिन सक्नेछ। 

अदालतकी वैतानिक वकिल ईन्द्रमाया थापाले भोलि पेसी तोकिएको र भोलि नै आदेश हुनसक्ने जानकारी दिइन्। नाबालिग गायिकाले आफूमाथि शाहले बिहे गर्ने आश्वासन दिई पटकपटक बलात्कार गरेको आरोप लगाएर तनहुँ र नवलपुर अदालतमा उजुरी दिएकी थिइन्। मुद्दा दायर भएपछि दुवैतर्फका जिल्ला अदालतले पुर्पक्षका लागि शाहलाई कारागार पठाउने आदेश दिएका थिए।

त्यसपछि शाहका कानुन व्यवसायीले दुवै जिल्लाको आदेश बदर गरी साधारण तारेख वा धरौटीमा छाड्न माग गरी उच्च अदालत पोखरामा निवेदन दिएका थिए। तर उच्च अदालतले पनि जिल्लाकै आदेश सदर गरेको थियो। घटना र घटनास्थल फरक भएकाले दुवैतर्फ पलविरुद्ध जबर्जस्ती करणीको मुद्दा चलिरहेको थियो।

बिहेको प्रलोभन देखाएर पटकपटक जबर्जस्ती करणी गरेको आरोप लगाएकी ती गायिकाले भने गत बैशाखमा दुवै अदालतमा बकपत्र दिन जाँदा आफूलाई पलले बलात्कार नगरेको, जाहेरी पनि अरुको उक्साहट र दबाबमा दिएको भन्दै बयान फेरेकी थिइन्।

यता नवलपुर अदालतले २१ भदौका लागि पेसी तोकेको छ। पललाई पुर्पक्षका लागि थुनामा राख्न अदालतले आदेश दिएपछि गत वर्ष चैत ३० यता उनी जिल्ला कारागार तनहुँमा छन्।