ओलीलाई प्रधानमन्त्रीको उम्मेदवार बनाएर चुनावमा होमिने एमालेको निर्णय

काठमाडौं– नेकपा एमालेले पार्टी अध्यक्ष केपी शर्मा ओलीलाई प्रधानमन्त्रीको उम्मेदवार घोषणा गरेर निर्वाचनमा जाने निर्णय गरेको छ। पार्टीको आज शनिबार बसेको केन्द्रीय कमिटीको बैठकले पार्टी अध्यक्ष ओलीलाई प्रधानमन्त्रीको रुपमा अघि बढाउने निर्णय गरेको हो । 

एमाले संसदीय दलका प्रमुख सचेतक एवम् पोलिटब्युरो सदस्य विशाल भट्टराईका अनुसार एमालेले समानुपातिक सांसदहरूलाई फेरि समानुपातिकमा नराख्ने समेत निर्णय गरेको छ । ‘हामीले निर्वाचनमा पार्टी अध्यक्षलाई प्रधानमन्त्रीको रूपमा अघि सार्ने र जनतालाई अपिल गर्ने भनेका छौं। समानुपातिक तर्फबाट प्रतिनिधिसभामा रहेका सांसदहरूलाई पुनः समानुपातिकमा नदोहोर्‍याउने समेत निर्णय भएको छ,’ उनले भने, ‘स्थानीय तहमा उम्मेदवार बनेकाहरूलाई पनि हामीले उम्मेदवार नबनाउने निर्णय गरेका छौं।’

वाम गठबन्धनका लागि बाटो खुला राख्ने निर्णय पनि एमालेले गरेको छ। ‘वाम गठबन्धनका लागि बाटो खुला राख्ने भनेका छौं। अब आफूलाई वाम भन्ने दलहरू गठबन्धनका लागि आएमा उनीहरूका लागि सहकार्यको बाटो खुला रहन्छ,’ उनले भने।