विपद् प्रभावितको राहतमा जुट्न गृहमन्त्री खाणको निर्देशन

काठमाडौं– गृहमन्त्री बालकृष्ण खाणले मुलुकका विभिन्न स्थानमा बाढीपहिरोले पुर्‍याएको क्षतिबारे सम्बन्धित जिल्लाका गृह प्रशासनसँग जानकारी लिएका छन्। उनले राहत, उद्धार र व्यवस्थापनमा जुट्न गृह प्रशासनलाई निर्देशन दिएका छन् ।

गृहमन्त्री खाणले म्याग्दीको मालिका गाउँपालिका–२ रुममा गएको पहिरो, चितवनको भरतपुर महानगर–२९ केराबारीमा गएको पहिरोले पुर्‍याएको सडक अवरोध र चितवनकै इच्छाकामना गाउँपालिकामा गएको पहिरोबाट भएको क्षति, उद्धार र राहत तथा सडक खुलाउन भइरहेको प्रयासबारे जानकारी लिएका हुन्।

गृहमन्त्री खाणले नेपाल प्रहरीका गण्डकी प्रदेश प्रमुख प्रहरी नायब महानिरीक्षक रामदत्त जोशी, चितवनका प्रमुख जिल्ला अधिकारी आशमान तामाङ, म्याग्दीका प्रमुख जिल्ला अधिकारी चिरञ्जीवी राना, म्याग्दीका प्रहरी प्रमुख तिलक भारतीलगायतलाई फोन गरेर आवश्यक व्यवस्थापनका लागि निर्देशन दिएका छन्।

विपद् व्यवस्थापनमा समस्या परे मन्त्रालयमा खबर गर्न उनले आग्रह गरेका छन्। सोमबार राती म्याग्दीको मालिका गाउँपालिका–२ मा माथिबाट झरेको पहिरोले घर पुर्दा सात जना बेपत्ता भएकामा दुई जनाको उद्धार गरिएको, दुई जनाको शव फेला परेको छ। अन्य व्यक्ति बेपत्ता छन्। म्याग्दीका प्रमुख जिल्ला अधिकारी रानाले घाइतेको उद्धार र बेपत्ता भएकाको खोजी जारी रहेको बताए।

नारायणगढ–मुग्लिङ सडक खण्डअन्तर्गत भरतपुर महानगर–२९ केराबारीमा पहिरो खस्दा सडक अवरुद्ध भएको छ। लेदो बगिरहेकाले तत्काल अवरुद्ध सडक खुल्ने सम्भावना नरहेको चितवनका प्रजिअ तामाङले बताए। मुग्लिङ–नारायणगढ सडक खण्डकै २० किलो र २१ किलोमामा पनि पहिरो गएको छ।

नारायणगढतर्फबाट जुगेडीमा सवारीसाधन रोकिएका र पहिरोका कारण फसेकालाई सरकारी गाडीबाट चितवनसम्म लैजाने काम भइरहेको प्रजिअ तामाङको भनाइ छ।