काभ्रेस्थलीको 'सुसाइड नोट' : बच्चाबच्चीको औधी माया लाग्छ, छोडेर जान सकिनँ

काठमाडौं- तारकेश्वर नगरपालिका-२ काभ्रेस्थलीमा ४ जनाको शव भेटिएको स्थानमा दिनेश पाण्डेले छोडेको सुसाइड नोट भेटिएको छ। सुसाइड नोटमा ४१ वर्षीय दिनेश पाण्डेले श्रीमती र दुई छोराछोरीको ज्यान लिनुपर्ने कारण उल्लेख गरेको प्रहरीको भनाइ छ।

आइतबार दिनेशले ३९ वर्षीया पत्नी सुनितासहित १३ वर्षीया छोरी आशिका र ८ वर्षीया छोरा आशिकको पनि ज्यान लिएर आत्महत्या गरेका थिए। 

चार जनाको शव भेटिएपछि अनुसन्धानका लागि खटिएको प्रहरीका अनुसार दिनेशको नोटमा घटनाको मुख्य दोषी श्रीमतीलाई बनाएका छन्। दिनेशले सन्तानको ज्यान लिने निर्णयबारे पनि सुसाइड नोटमा उल्लेख गरेका छन्।  श्रीमतीको हत्या गरेर आफूले आत्महत्या गर्ने भएपछि छोराछोरीलाई एक्लै छाड्न नचाहेको नोटमा लेखिएको छ। 

'मेरा बच्चाबच्चीको औधी माया लाग्छ,' दिनेशले छोडेको सुसाइड नोटलाई उद्धृत गर्दै अनुसन्धान अधिकारीले भने, 'मैले बच्चाबच्चीको मायाले गर्दा सँगै लैजान यो कठोर कदम चाल्नु परेको हो।'

आफूले कुवेतमा ११ वर्षसम्म बसेर कमाएको सम्पत्ति श्रीमती र माइतीले कब्जा गरेको आरोप सुसाइड नोटमा लेखिएको छ। सुनीताको पति आफू भएपनि आफूलाईसमेत श्रीमतीले मोबाइल हेर्न नदिएको आरोप लगाइएको छ। 

आफूलाई श्रीमतीले छिछि-दुरदुर गर्ने र हेप्ने गरेकाले आफूलाई पीडा भएको नोटमा लेखिएको प्रहरीले जानकारी दिएको हो।