राजनीतिक नेतृत्वकै कारण नागरिकमा असन्तुष्टि बढ्यो : सभामुख सापकोटा

काठमाडौं- प्रतिनिधिसभाका सभामुख अग्निप्रसाद सापकोटाले राजनीतिक दलका नेतृत्वमा रहेकाहरूकै कारण जनता अहिलेको परिस्थितिप्रति असन्तुष्ट रहेको बताएका छन्।

शनिबार भक्तपुरको सानोठिमीमा आयोजित ‘संघीय नमुना युवा संसद् अभ्यास कार्यक्रम’ उद्घाटन गर्दै सभामुख सापकोटाले यस्तो बताएका हुन्।

उनले संघीय संसद् र प्रदेशसभाको निर्वाचनमा इमानदार उम्मेदवारलाई जिताउन पैसाको खोलो बगाउने डरलाग्दो विकृति अन्त्यका लागि राजनीतिक दलहरूबाटै पहल हुनुपर्ने धारणा राखे।

‘निर्वाचनमा हुने सबैखाले विकृति अन्त्यका लागि अभियान सञ्चालन गर्न युवाहरूलाई आग्रह गर्छु। युवा पुस्ताले राजनीतिलाई सही लिकमा ल्याउने पहल गर्नुपर्छ। राजनीतिलाई पैसा कमाउने माध्यम बनाउने हो भने राजनीतिक दलप्रति जनताको वितृष्णा झनै बढ्नेछ’, सभामुख सापकोटाले भने।

सभामुख सापकोटाले युवाले निर्वाचनमा हुने विकृतिविरुद्ध व्यापक अभियान छेड्ने हो भने धेरै पैसा खर्च नगरीकनै निर्वाचन जितिन्छ भन्ने दृष्टान्त काठमाडौं, धरानलगायतका ठाउँमा हालै सम्पन्न स्थानीय तह निर्वाचनमा देखिएको बताए।

हालै सम्पन्न स्थानीय तह निर्वाचनको परिणामले विद्यमान परिस्थितिप्रति जनता सन्तुष्ट छैनन् भन्ने देखाएको उल्लेख गर्दै उनले त्यसबाट पाठ सिकेर राजनीतिक नेतृत्व अघि बढ्न ढिला भइसकेको धारणा व्यक्त गरे।

सभामुख सापकोटाले भने, ‘काठमाडौंको चुनाव र त्यसपछि अन्यत्रका चुनावले के देखाएको छ  भने विद्यमान परिस्थितिबाट तपार्इं, हामी र सबै जनता सन्तुष्ट छैनन्। यो असन्तुष्टि शालीन र निर्वाचनको माध्यमबाट जनताले अभिव्यक्त गरेका छन्। यो कुरा नेपालका राजनीतिक पार्टीहरूले, नेपालको राजनीतिक नेतृत्वमा बसेकाहरूले, हामी सबैले बुझ्न सकेनौं भने अवस्था अर्कै हुन सक्छ।’

आगामी संघीय र प्रदेशसभा निर्वाचनमा युवा पुस्ताले स्वतन्त्र, निष्पक्ष, शान्तिपूर्ण रूपमा मात्रै होइन, सही, असल, इमानदार उम्मेदवारलाई जिताउन यो अभियान सार्थक हुने विश्वास उनले व्यक्त गरे। 

उनले भने, ‘निर्वाचनमा सबैभन्दा डरलाग्दो कुरा तपाईं–हामी सबैले देखिरहेका छौं। निर्वाचनका पैसाको खोलो यति बगाइन्छ, त्यो भनिसाध्य छैन। जुनसुकै पार्टीभित्रका असल, इमानदार कार्यकर्ताले निर्वाचन लड्न गाह्रो हुने अवस्था छ।’

सभामुख सापकोटाले निर्वाचनमा हुने विकृति  अन्त्य गर्न ‘संघीय नमुना युवा संसद् अभ्यास कार्यक्रम’ले महत्त्वपूर्ण भूमिका वहन गर्ने विश्वास व्यक्त गरे ।