बुढीगंगाको त्रिशक्ति मावि मतदान केन्द्रमा तनाव, प्रहरीद्वारा हवाई फायर

धनगढी- बाजुराको बुढीगंगा नगरपालिका वडा नम्बर ९ को त्रिशक्ति माध्यमिक विद्यालय मतदान केन्द्रमा प्रहरीले हवाई फायर गरेको छ।

 नेकपा एमाले र सत्ता गठबन्धनका कार्यकर्ताबीच तनावको स्थिति सिर्जना भएपछि प्रहरीले हवाई फायर गरेको हो।

बाजुराका प्रमुख जिल्ला अधिकारी प्रकाशचन्द्र अधिकारीले त्रिशक्ति मावि मतदान केन्द्रमा तनाव सिर्जना भएपछि करिब १५ मिनेट मतदान स्थगित भएको र स्थिति नियन्त्रणमा लिन प्रहरीले हवाई फायर गरेको बताए।

‘विवाद भएपछि त्यसलाई नियन्त्रणमा लिन प्रहरीले हवाई फायर गर्नुपरेको हो,’ प्रमुख जिल्ला अधिकारी अधिकारीले भने, ‘अब पुनः मतदानको अवस्था बनेको छ।’

३० वैशाखमा स्थगित भएको चुनाव बिहीबार बिहान ७ बजेदेखि पुनः मतदान भइरहेको छ। नगर प्रमुख पदमा नेपाली कांग्रेसका रंग खाती र एमालेका रामबहादुर बानियाँ उम्मेदवार रहेका छन्।

यसअघि गत वैशाख ३० को मतदानका क्रममा सुरक्षा व्यवस्था फितलो भएकाले निष्पक्ष र स्वतन्त्र मतदान हुन नसकेपछि निर्वाचन आयोगले पुनः मतदानको निर्णय गरेको थियो।

यसअघिको मतदानका क्रममा १० मध्ये ६ वटा मतदानस्थलमा एमाले र कांग्रेस कार्यकर्ताहरूले बुथ कब्जा गरेपछि मतदान रोकिएको थियो। यो नेकपा एमालेका नेता कर्णबहादुर थापाको मतदान केन्द्र हो।