९ प्रशिक्षार्थी प्रहरीलाई 'हिट स्ट्रोक', भेन्टिलेटर र आईसीयूमा एक-एक जना

धनगढी- अत्यधिक गर्मीका कारण ९ जना प्रशिक्षार्थी प्रहरी जवान बिरामी परेका छन्। अत्यधिक गर्मीका कारण ‘हिट स्ट्रोक’ भएर बिरामी भएका हुन्। तीमध्ये ६ जना उपचार भएर फर्किएका छन्। एक जनाको भेन्टिलेटर, एक जनाको आईसियूमा राखेर र एक जनाको सामान्य बेडमा राखेर धनगढीस्थित सेती प्रादेशिक अस्पतालमा उपचार भइरहेको छ। 

जिल्ला प्रहरी कार्यालय कैलालीका प्रहरी नायब उपरीक्षक वेदप्रकाश जोशीका अनुसार ती मध्ये दुई जनाको आइसीयूमा राखेर उपचार भइरहेको छ। 

उनका अनुसार बेहोस हुनेमा सरोज चौधरी, प्रसान्त रावत, दिनेश सुनार, सन्तोष नेपाली, हरि बिक, अर्जुन थारु, भरत बिष्ट, हरिनारायण राना र ताराप्रशाद पुलामी मगर रहेका छन्। सरोज चौधरीलाई भेन्टिलेटर र प्रशान्त रावतलाई आईसीयूमा राखेर उपचार भइरहेको छ।

भदौ महिनामा भर्ना भएका ९८ जना प्रहरी जवानको सुदूरपश्चिम प्रदेश प्रहरी गणमा तालिम चलिरहेको छ। शारीरिक व्यायामअन्तर्गत १० किलोमिटर दौड हुने क्रममा ९ जना बेहोस भएको तालिम प्रशिक्षक प्रमुख बोधराज ओझाले बताए। 

उनले भने, 'सात जना उपचारपछि फर्किएका छन्। अहिले धनगढीमा अधिकतम तापक्रम ३६ दशमलव ८ डिग्री रहेको छ। पानी नपरेका कारण धनगढीमा अत्यधिक गर्मी रहेको छ।'