तीन नयाँ मन्त्रीले लिए राष्ट्रपतिसमक्ष सपथ

काठमाडौं– जनता समाजवादी पार्टीबाट नियुक्त भएका तीन जना मन्त्रीले राष्ट्रपति विद्यादेवी भण्डारीसमक्ष पद तथा गोपनीयताको सपथ लिएका छन्।

शीतलनिवासमा राष्ट्रपतिसमक्ष सपथ लिने मन्त्रीत्रयमा भौतिक पूर्वाधार तथा यातायातमन्त्री मोहम्मद इस्तियाक राई, कृषि तथा पशुपक्षी विकासमन्त्री मृगेन्द्र सिंह र वन तथा वातावरणमन्त्री प्रदीप यादव रहेका छन्।

सत्ता साझेदार जसपाले सरकारमा रहेका तीन मन्त्री फिर्ता बोलाएर तीनै जना नयाँ मन्त्रीको नाम सिफारिस गरेको थियो। प्रधानमन्त्री शेरबहादुर देउवाको सिफारिसमा राष्ट्रपतिले सोमबार नै तीन जनालाई मन्त्री पदमा नियुक्त गरेकी थिइन्।

यसअघि जसपामा भौतिक पूर्वाधारमन्त्रीमा रेनुकुमारी यादव, वनमन्त्री रामसहाय यादव र कृषि तथा पशुपक्षी विकासमन्त्री महेन्द्र राय यादवले जिम्मेवारी सम्हाल्दै आएका थिए।

सपथ कार्यक्रममा उपराष्ट्रपति नन्दबहादुर पुन, प्रधानमन्त्री शेरबहादुर देउवा, राष्ट्रिय सभाका अध्यक्ष गणेशप्रसाद तिमिल्सिनालगायत उपस्थित थिए।