माओवादी केन्द्रीय कमिटी बैठकका ९ एजेन्डा

काठमाडौं– नेकपा माओवादी केन्द्रको केन्द्रीय कमिटी बैठक आइतबार काठमाडौंमा सुरु भएको छ। प्रज्ञा भवन कमलादीमा सुरु भएको बैठकमा अध्यक्ष पुष्पकमल दाहाल प्रचण्डले कार्यसूचीबारे जानकारी गराएका छन्।

बैठकमा नयाँ सदस्यहरुको सपथ ग्रहण, बैठक सञ्चालन प्रक्रियाबारे अध्यक्षबाट जानकारी, प्रदेशहरुबाट संक्षिप्त रिपोर्टिङ, अध्यक्षबाट वर्तमान परिस्थितिबारे रिपोर्ट, संगठनात्मक विषय, स्थानीय निर्वाचनको समीक्षा, आगामी प्रदेश र संघको निर्वाचनको तयारी र विविध गरी नौ एजेण्डामा छलफल हुनेछ।

बैठकका एजेण्डामा थप्ने घटाउने केही भए धारणा राख्न प्रचण्डले मौका दिएका थिए। तर सुझाव नआएपछि यी एजेण्डा पास भएका छन्।

तीन दिन चल्ने बैठकमा स्थायी कमिटी, पोलिटब्युरो कमिटी र पदाधिकारी चयन गर्ने एजेन्डा भएकाले यसलाई चासोका साथ हेरिएको छ।  माओवादी केन्द्रको पदाधिकारी चयनमा पनि धेरैको चासो छ। विशेष गरी माओवादी केन्द्रमा महासचिवको जिम्मेवारी कसले पाउने भन्नेमा सर्वत्र चासो छ। 

महासचिव दाबी गरिरहेका जनार्दन शर्मा र वर्षमान पुन दुवै प्रचण्ड निकट भएका कारण उनलाई निर्णय गर्न अप्ठ्यारो परिरहेको छ। महाधिवेशन भएको  ६ महिना नाघिसक्दा पनि माओवादीमा पदाधिकारीको टुंगो लाग्न सकेको छैन।