प्रधानमन्त्रीले समयबद्ध काम गर्न सक्नुभएन : पौडेल

काठमाडौं- नेपाली कांग्रेसका नेता रामचन्द्र पौडेलले प्रधानमन्त्रीसमेत रहेका पार्टीका सभापति शेरबहादुर देउवाले सँधै हतार छ भने पनि कामहरु अलपत्र छाड्ने गरेको बताएका छन्।

उनले देउवाले समयबद्ध रूपमा काम गर्न नसकेको बताए। पूर्व सांसद मञ्च नेपालले ६४औं संसद दिवसका अवसरमा संघीय संसद सचिवालयमा गरेको कार्यक्रममा बोल्दै पौडेलले यस्तो बताएका हुन्।

उक्त कार्यक्रममा प्रधानमन्त्री देउवा रहे पनि काम छ भन्दै सबैभन्दा पहिले बोलेर निस्किएका थिए।

'हाम्रो प्रधानमन्त्रीजी हतार छ भनेर जानुभयो। ठिक छ, देशको प्रधानमन्त्रीलाई समय कम हुन्छ मलाई त्यो पनि थाहा छ,' उनले भने, 'सबै प्रधानमन्त्रीलाई हुन्छ। तर हाम्रो प्रधानमन्त्रीलाई कति हतार छ भन्ने कुरा त कामकारबाहीबाट देखिन्छ। प्रधानमन्त्रीले मलाई समय पुगेन भन्ने, काम सधैं अलपत्र छाड्ने?' उनले पार्टीमा पनि महाधिवेशन भएपछि छ महिनाभित्र गर्नुपर्ने काम अलपत्र रहेको बताएका थिए।