रवि लामिछाने र रमेश खरेलबीच सहकार्यको विषयमा छलफल

काठमाडौं- नवगठित राष्ट्रिय स्वतन्त्र पार्टीका अध्यक्ष रवि लामिछाने र नेपाल सुशासन पार्टीका अध्यक्ष रमेश खरेलबीच भेटवार्ता भएको छ। भेटवार्ताका क्रममा उनीहरूबीच समसामयिक राजनीतिक विषयमा छलफल भएको बताइएको छ।

सुशासन पार्टीले आफ्नो फेसबुक पेजमा तस्बिरसहित भेटघाटको जानकारी गराएको हो। दुई पार्टीबीच आगामी राजनीतिक यात्रामा सहकार्य गर्ने विषयमा सकारात्मक कुराकानी भएको सुशासन पार्टीले जनाएको छ।

'भेटमा आगामी राजनीतिक यात्रामा सहकार्य गर्ने विषयमा सकारात्मक कुराकानी भएको छ,' रविनिकट दीपक बोहराले फेसबुकमा स्टाटस लेखेका छन्।

असार ७ गते नै रविले राष्ट्रिय स्वतन्त्र पार्टी दर्ताका लागि निर्वाचन आयोगमा निवेदन दिएका छन्। उनको दलले 'स्वतन्त्र' नाम पाउन नहुने भन्दै आयोगमा स्वतन्त्र उम्मेदवारी घोषणा गरेका मनोज पण्डितलगायतले उजुरी दर्ता गराएका छन्। 

यस्तै रविको दलले 'घण्टी' चुनाव चिह्न समेत माग गरेका छन्। उक्त चुनाव चिह्न खारेज भएको १ वर्ष नपुगेकाले रविले माग गरेको दलको नाम र चुनाव चिह्न प्राप्तिमा असहज भएको छ। यद्यपि निर्वाचन आयोगले दुवै विषयमा निर्णय गर्न बाँकी छ। 

नेपाल प्रहरीका पूर्वडीआईजीसमेत रहेका रमेश खरेल आगामी संसदीय चुनावमा काठमाडौं-१ बाट उम्मेदवारी दिने तयारीमा छन्। रविले पनि चुनाव लड्ने घोषणा गरेपनि निर्वाचन क्षेत्रका विषय टुंगो लागिनसकेको बताउँदै आएका छन्।