सीमा विवादबारे ओलीले भने- अहिलेसम्म म प्रधानमन्त्री भइरहेको भए समाधान भइसक्थ्यो

काठमाडौं- प्रमुख प्रतिपक्ष दल नेकपा (एमाले)का अध्यक्ष एवम् पूर्वप्रधानमन्त्री केपी शर्मा ओलीले कुनै देशले 'आफ्नो भूगाग चाहियो' भन्नु अर्घेल्याँई नभएको बताएका छन्।  अध्यक्ष ओलीले लिपुलेक, लिम्पियाधुरा र कालापानी सुगौली सन्धिपछि नेपालले भोगचलन गर्दै आएको भूभाग भएको उल्लेख गर्दै त्यो चाहियो भन्नु अर्घेल्याई नभएको बताएका हुन्। 

मंगलबार पूर्वराजदूतहरूको समूहले काठमाडौंमा आयोजना गरेको अन्तरक्रिया कार्यक्रममा बोल्दै ओलीले छिमेक सम्बन्धलाई सुदृढ बनाउनकै लागि आफूले भौगोलिक अखण्डताको सवालमा प्रधानमन्त्री हुँदा भारतसँग उच्चस्तरीय वार्ता गरेको उल्लेख गरे। राजनीतिक खचपच नभएको भए हालसम्म लिपुलेक, लिम्पियाधुरा र कालापानी नेपालको भूगोल भइसक्ने जस्तो आफूलाई लाग्ने गरेको पनि बताए। आफू प्रधानमन्त्रीबाट हट्नुलाई उनले राजनीतिक खचपचको संकेत गरे। 

'हाम्रो भूभाग हामीलाई फिर्ता चाहियो भन्ने कुरा कुनै अर्घेल्याई होइन। यो सम्बन्ध बिगार्ने कुरा पनि होइन। यस्ता कुरालाई सल्ट्याउनुपर्छ,' ओलीले भने, 'नेपालमा राजनीतिक खचपच नभएको भए लिम्पियाधुरा, लिपुलेक, कालापानी वा अन्य सीमा सन्दर्भहरु चाँहि अहिलेसम्म समस्या समाधान भइक्थ्यो भन्ने मलाई लाग्छ। यो विषयमा मैले खुलस्त छलफल गरेको थिएँ। यो मित्रतालाई सुदृढ गराउनका लागि हो।’

अध्यक्ष ओलीले राष्ट्रिय हितको पक्षमा खुलस्त भएर कुराकानी गर्दामात्रै देशहरुको बीचको सम्बन्ध अझ सुदृढ हुने कुरा आफूले उच्च स्तरीय वार्ताको क्रममा पटकपटक राखेको पनि स्मरण गरे। 

एक्काईसौं शताब्दीमा हामीले समस्याहरु भन्न नसकेर, बोल्न नसकेर वा सरकारमा बस्नेहरुले आफना सत्ता स्वार्थहरुलाई केन्द्र भागमा राखेर राष्ट्रिय हितहरुको प्रश्नमा सौदावाजी गर्नु हुन्न। राष्ट्रिय हितको पक्षमा उभिनुपर्छ। खुलस्त पनि हुनुपर्छ। भन्न खोजेका कुरा नबुझिने गरी प्रस्तुत भएर के हुन्छ ? हामीले मानेका सन्धि, सम्झौंताले तय गरेका सीमालाई हामीले मानेर र यदि हामीले लिम्पियाधुरा, लिपुलेक, कालापानीको कुरा गर्ने हो भने सुगौली सन्धिपछि एक सय ४६ वर्ष हामीले भोगचलन गरेको भूभाग हो। एक सय ४६ वर्ष हामीले भोगचलन गर्‍यौं। त्यसपछि एउटा समय सन्दर्भमा हाम्रो कालापानीमा भारतीय फौज आएर बस्यो। र साठी वर्षदेखि त्यहाँ छ। कालापानीमा भारतीय फौज भएको हुनाले उता लिपुलेक र कालापानीमा हामी प्रवेशै गर्न पाएनौं। यो बिल्कुल यथार्थ हो। मैले अहिले भनिन भने पनि, मैले भनिन भने पनि अलि पछि नेपालीले भन्ने छन। भन्छन भन्छन, भन्नैपर्छ। र, यस्तो समस्या सुगौली सन्धि सो सबैको मानेको छ। यसबाट प्राप्त गरेको भूभाग हो यो।

यसमा हामीले अर्घेल्याई गर्र्यौं‍ कि भन्ने ठान्नुपर्ने कुनै आवश्यक्ता छैन। अनि कहिल्यै पनि उठाउने, कसैले पनि नबोल्ने अनि हाम्रौ भौगोलिक अखण्डता, हाम्रो सीमा सम्बन्धि प्रश्न, हाम्रो सीमा यो हो। छलफल गरौं र यसलाई टुंग्याऔं। यो हाम्रो भूभाग चाँही हामीलाई फिर्ता चाहियो भन्ने कुरा कुनै अर्घेल्याई होइन। यो सम्बन्ध बिगार्ने कुरा पनि होईन। यस्ता कुरालाई सल्टयाउनुपर्छ। नेपालमा राजनीतिक खचपच नभएको भए लिम्पियाधुरा, लिपुलेक, कालापानी वा अन्य सीमा सन्दर्भहरु चाँही अहिलेसम्म समस्या समाधान भईसक्थ्यो भन्ने मलाई लाग्छ। यो विषयमा मैले खुलस्त छलफल गरेको थिए। यो मित्रतालाई सुदृढ गराउनका लागि हो।’