त्रिभुवन विमानस्थलमा धुवाँको मुस्लो देखिएपछि...

काठमाडौं– त्रिभुवन अन्तर्राष्ट्रिय विमानस्थलमा बुधबार विपद् प्रतिकार्य अभ्यास गरिएको छ। विमानस्थल आधा घण्टा बन्द गरेर उक्त अभ्यास गरिएको हो। 

विमानस्थलमा जहाज दुर्घटनाको काल्पनिक घटनाअनुसार त्यसको प्रतिकार्यको अभ्यास गरिएको हो। अभ्यासका क्रममा आकाशमा कालो धुवाँको मुस्लो देखिएको थियो भने दमकल, सुरक्षाकर्मी तथा एम्बुलेन्स सक्रिय भएका थिए।

दुर्घटनापछि उद्धारको दृश्य देखिरहँदा हवाई सेवा प्रभावित भएको थियो। दिउँसो ३ देखि साढे ३ बजेसम्म उडान तथा अवतरण सेवा अवरुद्ध भएको हो।

कृत्रिम दुर्घटना भएकाले यसबाट विमानमा कुनै क्षति पुगेन, जनधनको क्षति भएन। त्रिभुवन अन्तर्राष्ट्रिय विमानस्थल नागरिक उड्डयन कार्यालयको संयोजनमा पूर्ण संकटकालीन अवस्थाको अभ्यास भएको हो। दुर्घटना र उद्धारका सबै दृश्य बनावटी थिए।