एसिया कप छनोटमा नेपालका लगातार दोस्रो हार

काठमाडौं- एसिया कप अन्तर्गतको तेस्रो चरणको छनोट खेलमा नेपालले हार बेहोरेको छ। कुवेतमा जारी छनोटको पहिलो खेलमा जोर्डनसँग हार बेहोरेको नेपालले दोस्रो खेलमा कुवेतसँग पनि हार बेहोरेको हो।

कुवेतको जबर अल अहमद रंगशालामा भएको खेलमा नेपालले ४-१ को हार बेहोरेको हो। नेपालविरुद्ध आयोजक टिमका फहद अल्हेबइतर, र मोबारेक अल्कलफलेसमान १-१ गोल गरेका थिए। त्यस्तै, युसुफ अल सुलइमले भने दुई गोल गरे।

खेलको २८औं मिनेटमा फहदले गोल गरेका थिए। यससँगै पहिलो हाफमा नेपाल एक गोलले पछि रह्यो। खेलको ४८औं र ७०औं मिनेटमा युसुफले गोल गरे भने मोबारेकले खेलको ७२औं मिनेटमा गोल गर्दै ४-० को अग्रता बनाएका थिए।

खेलको इन्ज्युरी समयमा दर्शन गुरुङले गोल गरेर नतिजालाई ४-१ बनाएका थिए। छनोटको पहिलो खेलमा नेपालल जोर्डनसँग हार बेहोरेको थियो। समूह एमा रहेको नेपाल अहिले दोस्रो हारसँगै समूहका पुछारमा छ।

यता, समूह एकै अर्को खेलमो जोर्डनले इन्डोनेसियासँग हार बेहोरेको छ। गएरातिको जितसँगै इन्डोनेसियाले दुई खेलबाट छ अंक जोडेको छ। ऊ तालिकाको शीर्षस्थानमा समेत छ।  कुवेत र जोर्डनको समान ३-३ अंका रहेको छ।