आज सुदूरपश्चिम प्रदेशको नीति तथा कार्यक्रम

धनगढी- सुदूरपश्चिम प्रदेशको आगामी आर्थिक वर्षको नीति तथा कार्यक्रम आज (आइतबार) आउने भएको छ।

आज दिउँसो ४ बजे बस्ने प्रदेशसभाको बैठकमा प्रदेश प्रमुख देवराज जोशीले नीति तथा कार्यक्रम पेस गर्ने कार्यसूची रहेको प्रदेशसभा सचिवालयले जानकारी दिएको छ।

बजेट ल्याउनु भन्दा १५ दिनअगावै नीति तथा कार्यक्रम ल्याउनुपर्ने कानुनी व्यवस्था भए पनि यस वर्ष पनि ढिला गरी प्रस्तुत हुन लागेको हो।

आर्थिक वर्ष २०७८/०७९ को नीति तथा कार्यक्रम पनि राजनीतिक उतार चढावका कारण ढिला गरी सभामा पेस भएको थियो। आगामी आर्थिक वर्षको नीति तथा कार्यक्रम जेठ १५ भित्र ल्याइसक्नुपर्नेमा सभामा ढिला गरी पेस हुन लागेको हो।

स्थानीय तहको निर्वाचनका कारण मतगणना प्रक्रियाले सभा ढिला गरी सुरु भएको थियो। जेठ १६ गतेदेखि सुरु भएको प्रदेश सभाको दशौँ अधिवेशनको प्रथम बैठकमा आर्थिक मामिला मन्त्री प्रकाश रावलले विनियोजन विधेयक २०७९ का सिद्धान्त तथा प्राथमिकतालाई छलफलका लागि पेस गरेका थिए।

सो विधेयकमाथि सभामा तीन दिनसम्म व्यापक छलफल गरिएको थियो। प्रदेश सरकारले असार १ गते अगामी वर्षको बजेट ल्याउनुपर्ने संवैधानिक व्यवस्था छ।