साफ यु–१५ च्याम्पियनसिपमा आज नेपाल र पाकिस्तानसँग भिड्दै 

काठमाडौं- साफ यु–१५ महिला फुटबल च्याम्पियनसिपमा आज (शनिबार) नेपालले पाकिस्तानसँग खेल्दैछ । भुटानको थिम्पुमा जारी साफ च्याम्पियनसिपमा नेपालले आफ्नो पहिलो खेल पाकिस्तानसँग खेल्न लागेको हो । यो पाकिस्तानको भने दोस्रो खेल हो । पाकिस्तान आफ्नो पहिलो खेलमा बंगलादेशसँग १४–० को फराकिलो गोल अन्तरमा पराजित भएको थियो । 

खेल चाम्लिङथाङ रंगशालामा साँझ ७ बजेपछि शुरु हुनेछ । उपाधि जित्ने लक्ष्यमा रहेको नेपाल पहिलो खेलमा पाकिस्तानलाई निराश पार्दै सुखद शुरुवात गर्ने योजनामा हुनेछ । नेपाली टिमकी मुख्य प्रशिक्षक गंगा गुरुङले अघिल्लो वर्ष बंगलादेशमा भएको प्रदर्शनलाई बिर्सदै यसपटक राम्रो प्रदर्शन गर्ने बताएकी छिन् । 

‘हामीले अघिल्लो सिजन अपेक्षाकृत प्रदर्शन गर्न सकेनौ । यसपटक टिममा सुधार आएको छ ।’ प्रशिक्षक गुरुङले भनिन्, ‘नियमित प्रशिक्षण पाइरहेका कारण यसपटक खेलाडीमा उच्च मनोवल रहेको छ । खेलमा हारजित आफ्नो ठाउमा रहनेछ । तर, भुटानमा नेपाली चेलीको प्रदर्शन उच्च रहनेछ । नेपालले सोमबार बंगलादेशसँग खेल्नेछ ।