‘चपली हाइट’का नायक राज घिमिरे बने वडाध्यक्ष

काठमाडौं- दर्शकले अत्यधिक रुचाइएको चलचित्र 'चपली हाइट' का नायक राज घिमिरे (सानुराजा घिमिरे) ले ११ मत बढी ल्याएर वडा अध्यक्ष जितेका छन्। अभिनेता घिमिरे ललितपुरको गोदावरी नगरपालिका वडा नम्बर ३ बाट विजयी भएका हुन्।

अभिनेता घिमिरे माओवादी केन्द्रका तर्फबाट १ हजार ५९ मत ल्याएर विजयी भएका छन्। त्यस्तै एमालेका उम्मेदवार श्रीराम आचार्यले १ हजार ४८ मत ल्याएका थिए।

अघिल्लो स्थानीय चुनावमा उम्मेदवार रहेका घिमिरे पराजित भएका थिए चुनावअघि सामाजिक सञ्जालमार्फत उनले यदि आफूले वडाध्यक्ष जितेमा अध्यक्षको हैसियतमा पाउने कुनै पनि सुविधा नलिने बताएका थिए।

८ वर्ष अगाडि चपली हाइट बाहेक लुट, अन्य फिल्म र म्युजिक भिडियोमा समेत अभिनय गरेका थिए। २०५७ सालबाट अभिनय यात्रा सुरु गरेका राज पर्यटन तथा होटेल व्यवसायी पनि हुन्। स्थानीय निर्वाचन २०७४ बाट भने उनी राजनीतिमा लागेका हुन्। 

कोरोना संक्रमणका बेला लागेको लकडाउनमा घिमिरेले गोदावरी नगरपालिकाका १ देखि ४, १०, १३ र १४ वडामा माइकिङ तथा राहत सामग्री उपलब्ध गराएका थिए। ललितपुरको दक्षिणी भेगमा पर्ने भट्टेडाँडा र छपेली क्षेत्रमा पनि उनी माइकिङ गर्दै पुगेका थिए। ‘म कलाकार हुँ, मलाई त्यस्तो लोकप्रियता चाहिएको छैन, मेरो सहयोगले कसैको पेट भरियोस् भन्ने मात्रै चाहन्छु,’ उनले त्यतिखेर भनेका थिए ।

आफ्नो पारिवारिक पृष्ठभूमि ‘कम्युनिस्ट’  बताउने घिमिरेले गोदावरी नगरपालिका ३ को वडा अध्यक्ष हुनुअगाडि मेयर उपमेयरको उम्मेदवार हुने सोच थियो तर राजनीतिक भागबण्डाले त्यो अवसर अहिले नपाएको बताएका थिए।