नेकपाको विद्रोही समूहले विप्लवलाई महासचिवबाट हटायो

काठमाडौं– नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टीबाट निष्कासित नेताहरुको भेलाले विप्लवलाई नै पार्टीबाट निष्कासन गर्ने निर्णय गरेको छ। विद्रोही नेताहरूको भेलाले महासचिवबाट विप्लवलाई हटाएको हो।

चितवनको पर्सामा बुधबार सुरु भएको विद्रोही पक्षको राष्ट्रिय भेलाले महासचिवको जिम्मेवारीबाट विप्लवलाई हटाउँदै पार्टीबाटै निष्कासन गरेको हो।

त्यसैगरी भेलाले खड्गबहादुर विश्वकर्मा प्रकाण्डलाई प्रवक्ताको जिम्मेवारीबाट हटाएको छ। भेलाले धर्मेन्द्र बास्तोलालाई पार्टीको संयोजक तोकेको छ। 

भेलाबाटै नयाँ पार्टी गठन गर्ने तयारीसमेत विद्रोही नेताहरुको छ। स्थानीय चुनाव उपयोग गर्ने या नगर्नेबारेमा नेकपामा विवाद सुरु भएर एकअर्कालाई कारवाही गर्ने तहसम्म पुगेको हो। पार्टीको नीति विपरीत गएको भन्दै विप्लवले नेताहरु धर्मेन्द्र बाँस्तोला र हेमन्तप्रकाश वलीलाई पार्टीबाट निष्कासन गरेका थिए।