कांग्रेसबाट हुप्सेकोट गाउँपालिका अध्यक्ष उम्मेदवार बनेकी पाण्डेमाथि आक्रमण

पूर्वी नवलपरासी- स्थानीय तह निर्वाचनका लागि हुप्सेकोट गाउँपालिकामा नेपाली कांग्रेसको तर्फबाट अध्यक्ष उम्मेदवार बनेकी लक्ष्मी पाण्डेले आफूमाथि आक्रमण भएको बताएकी छन्। 

मंगलबार राति ८ बजे चुनावी अभियानबाट फर्किँदै गर्दा आफूहरूमाथि हुप्सेकोटको झयालबासमा आक्रमण भएको उनले बताएकी छन्।

उनले आफूमाथि गौंडो कुरेर एमालेका कार्यकर्ताले आक्रमण गरेको आरोप लगाएकी छन्। एमालेबाट यसअघि निर्वाचित जनप्रतिनिधिसहितका स्थानीय नेता तथा कार्यकर्तालाई उनले आक्रमणको आरोप लगाएकी छन्।

एमालेको झण्डा बोकेर प्रचारमा आएको टोलीले नियोजितरुपमा आक्रमण गरेको पाण्डे बताएकी छन्। उनीहरूले पिछा गरेको थाहा पाएपछि राति स्थानीय बिरु कुमालको घरमा छिरेको तर सोही स्थानमा पुगेर उनीहरूले आक्रमण गरेको पाण्डेको भनाइ छ।

आक्रमणबाट पाण्डे चढेको गाडीमा क्षति पुगेको छ। पाण्डेको छाती र खुट्टामा चोड लागेको छ।