काठमाडौं महानगरको चुनावी कमाण्डर ईश्वर पोखरेल

काठमाडौं– नेकपा एमालेले काठमाडौं महानगरपालिकाको चुनावी प्रचारप्रसारलाई तीव्र बनाउन पार्टीका वरिष्ठ उपाध्यक्ष ईश्वर पोखरेललाई ‘काठमाडौँ महानगर निर्वाचन परिचालन निर्देशक समिति’ को संयोजकको जिम्मेवारी दिएको छ।

‘चुनावी प्रचारप्रसारलाई तीव्र बनाउँदै मेयर–उपमेयरसहित ३२ वटै वडाका सबै उम्मेदवारलाई विजयी गराउन नेकपा एमाले अब चुनावी मैदानमा उत्रिएको छ। चुनावी अभियान ३२ वटै वडामा अघि बढिरहेको छ। अब थप व्यवस्थित ढंगले यो काम अघि बढ्छ,’ काठमाडौं महानगर निर्वाचन परिचालन सचिवालयमा सोमबार आयोजित कार्यक्रममा संयोजक पोखरेलले भने।

पोखरेलले आजै ३२ वटै वडाको गतिविधि र त्यहाँ भइरहेको चुनावी प्रचारबारे जानकारी लिएका छन्। नेकपा एमाले काठमाडौं महानगर कमिटीका अध्यक्ष तथा निर्देशक समितिका सदस्य निर्मल देउलाले अब मुलुकको सबैभन्दा ठूलो र पुरानो महानगर काठमाडौं महानगरपालिकाको चुनावी गतिविधि थप संयमित र व्यवस्थित ढंगले अघि बढ्ने बताए।

एमालेले काठमाडौं महानगरको मेयरमा केशव स्थापित र उपमेयरमा सुनिता डंगोललाई उम्मेदवार बनाएको छ।