जापानी स्ट्राइकर योसिनोरी न्यूकास्टल अनुबन्ध

जापान- न्युकास्टल युनाइटेडले जापानी स्ट्राइकर योसिनोरी मुतोलाई अनुबन्ध गरेको छ। उनलाई युनाइटेडले माइन्जबाट चार बर्षका लागि अनुबन्ध गरेको हो। उनले गत सिजन माइन्जमा रहेर बुन्डेस लिगाका २७ खेल खेल्दै आठ गोल गरेका थिए। 

अब उनी युनाइटेडमा रहेर प्रिमियर लिग खेल्ने छन्। उनले बुन्डेस लिगामा तीन सिजन बिताए। बुन्डेस लिगाका तीन सिजनमा उनले ६६ खेल खेल्दै २० गोल गरेका छन् । राष्ट्रिय टिमका लागि २५ खेलमा २ गाल गरेका छन्।

योसिनोरी रुस विश्वकपमा जापानबाट सहभागिता जनाएका थिए। तर, उनले समुह चरणको एक खेल मात्र खेले। उनले समूह चरणमा पोल्यान्डसँगको खेल खेलेका थिए । जहाँ जापान पोल्यान्डसँग १–० ले पराजित भएको थियो। उनी न्युकास्टल युनाइटेडमा खेल्ने जापानका एक मात्र र पहिलो खेलाडी हुन। ठुलो क्लबमा स्थानपाउनु नै आफुलाई सम्मानित गरिएको महसुस गरेको योसिनोरीले बताए।

बिहिबार उनलाई वर्क परमिट दिएपछि मात्र उनीसँग सम्झौता गरिएको थियो। उनलाई युनाइटेडले ९.५ मिलियन पाउण्डमा भित्र्याएको बताइएको छ । युनाइटेडले गत हप्ता स्विजरल्यान्डका डिफेन्डर फाबियन स्कारलाई अनुबन्ध गरेको थियो।