कांग्रेस बझाङ जिल्ला सभापति सवार जीप दुर्घटना, एक जनाको मृत्यु

धनगढी- नेपाली कांग्रेस बझाङका सभापति खडक बोहरा सवार जीप दुर्घटनामा परेको छ। बोहरा र उनको परिवार सवार जीप दुर्घटना हुँदा एक जनाको ज्यान गएको प्रहरीले जनाएको छ।

बझाङको सुर्माबाट धनगढीतर्फ आइरहेको सुपप्र ०१–००१ च ००९५ नम्बरको जीप गएराति १२:४० बजे वित्थडचिर गाउँपालिका-४ देउलेख बजार नजिकै दुर्घटना भएको प्रहरीले बताएको छ। 

दुर्घटनामा सुर्माका विनोद बोहराको घटनास्थलमै मृत्यु भएको जिल्ला प्रहरी कार्यालय बझाङले जनाएको छ। त्यस्तै, अन्य तीन जना घाइते भएका छन्। 

उनीहरूलाई उपचारका लागि देउलेख प्राथमिक स्वास्थ्य केन्द्रबाट धनगढी रेफर गरिएको छ। जीपमा तीन महिला र ६ पुरुष गरी ९ जना सवार रहेका बताइएको छ। घटनाबारे अनुसन्धान थालिएको प्रहरीले जनाएको छ।