परमादेशी शक्ति असत्यका प्रतीक हुन् : ओली

काठमाडौं- नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले राजनीतिमा अबको लडाईं सत्य र असत्यबीचको भएको बताएका छन्। 

मंगलबार पोखरामा आयोजित पार्टी प्रवेश कार्यक्रमलाई सम्बोधन गर्दै अध्यक्ष ओलीले राजनीतिमा यस्तो बताएका हुन्। सत्य र असत्यबीच बेलाबेला लडाईं हुने दृष्टान्त दिँदै ओलीले आजको सत्य र असत्यको बीचको लडाईं परमादेशी र जनादेशीबीचको लडाईं भएको बताएका हुन्। अध्यक्ष ओलीले नेकपा एमाले जनताको अभिमतबाट जनताको पक्षमा लड्ने पार्टी भएको पनि दाबी गरेका थिए। 

‘आजको सत्य र असत्यको लडाईं समय समयमा हुन्छ। कहिले रावण र रामका बीचमा हुन्छ। कहिले पाण्डव र कौरवका बीचमा हुन्छ। कहिले कृष्ण र कंशका रुपमा हुन्छ। अनेक रुपमा सत्य र असत्यका बीचमा लडाईं हुन्छ,' ओलीले भने, 'आजको सत्य र असत्यको बीचको लडाईं परमादेशी र जनादेशीका बीचमा भएको लडाईं हो। असत्यको प्रतीकको लडाईं भनेको परामादेशी शक्तिहरू हुन्। जनादेशको पक्षमा रहेका जनताको अभिमतबाट अघि बढ्न खोज्ने हामी जनताको पक्षमा लडिरहेका छौँ।’

अध्यक्ष ओलीले राजनीतिक मैदानका सर्वश्रेष्ठ सिद्धान्तबाट नेकपा एमाले अघि बढ्ने दाबी गरेका थिए।