बेञ्जेमाको लेट गोलमा रियललाई नौ अंकका अग्रता

काठमाडौं- फरवार्ड करिम बेञ्जेमाले खेलको ८३औं मिनेटमा गोल गरेपछि रायो भालोकानोको मैदानमा रियल मड्रिडले घरेलु टिमविरुद्ध १-० को जित निकालेको छ।

खेलको ६६ प्रतिशत समय बलमा नियन्त्रण बनाएको रियलले साँघुरो जित निकालेको हो। खेल अवधिभर विपक्षीको पोस्टमा १३ प्रहार गरे पनि रियलले छ पटक मात्र पोस्टको सही दिशामा प्रहार गरेको थियो।

यता रायो भालोकानोले रियलविरुद्ध १९ प्रहार गरेको थियो। तर गोल गर्नसकेन। साँघुरो जितसँगै रियलले ला लिगाको शीर्षस्थानमा नौ अंकका अग्रता बनाएको छ। रियलले २६ खेलबाट ६० अंक बनाएको हो।

त्यस्तै, दोस्रो स्थानको सोभियाको ५१ र तेस्रो स्थानको रियल बेटिसको ४६ अंक छ। रायो भालोकानो भने ३१ अंकका साथ १२ औं स्थानमा छ।

ला लिगामा गएराति नै भएको खेलमा एट्लेटिको मड्रिडले सेल्टा भिगोविरुद्ध २-० गोलको जित निकालेको छ। यो जितसँगै एट्लेटिको ला लिगामा ४५ अंक भएको छ।