माओवादी र समाजवादीले बोलाए पार्टीको बैठक : एमसीसीबारे निर्णय लिने

काठमाडौं- एमसीसीबारे छलफल गर्न माओवादी केन्द्रले पूर्व स्थायी कमिटी सदस्यहरूको बैठक बोलाएको छ। बैठक आज बिहान अध्यक्ष पुष्पकमल दाहाल प्रचण्डको निवास खुमलटारमा बस्ने तय भएको छ। बैठकमा एमसीसीबारे छलफल बताइएको छ।

यस्तै अर्को सत्ता घटक एकीकृत समाजवादीले पनि आज ११ बजे सचिवालय बैठक बोलाएको छ। एकीकृत समाजवादीको बैठकमा पनि एमसीसी बारे छलफल हुने जनाएको छ। 

माओवादी केन्द्र र एकीकृत समाजवादीका शीर्ष नेताहरूबीच शनिबार पनि एमसीसीका विषयमा छलफल भएको थियो। 

कांग्रेस र एमालेबीच एमसीसी पारित गर्न सहकार्य हुने संकेत पाएपछि माओवादी केन्द्र र एकीकृत समाजवादी लचिलो बनेका छन्।

शनिबार पनि कांग्रेस र एमाले नेताहरूबीच छलफल भएको थियो। सत्ता गठबन्धन टुटेमा कांग्रेस र एमाले एक ठाउँमा आउने सम्भावना बढेसँगै माओवादी र एकीकृत समाजवादी एमसीसीका पक्षमा लचिलो बनेका हुन्।

आइतबार प्रतिनिधिसभा बैठक बस्नुअघि माओवादी केन्द्र र एकीकृत समाजवादीका नेताहरूले आफ्नो पार्टीको निर्णयसहित एमसिसीको पक्षमा मतदान गर्ने प्रतिबद्धता नजनाए गठबन्धन टुट्ने कांग्रेसले जनाएको छ।