बालकोट वार्तापछि मन्त्री कार्कीले भने- भेटघाटको क्रम जारी रहन्छ

काठमाडौं- सत्ताको नेतृत्वकर्ता दल नेपाली कांग्रेस र प्रमुख प्रतिपक्षी दल नेकपा एमालेको छलफल सकिएको छ। एमाले अध्यक्ष निवास बालकोटमा भएको दुई दलका शीर्ष नेतााहरू सम्मिलित छलफलपछि सरकारका प्रवक्ता समेत रहेका कांग्रेस नेता ज्ञानेन्द्रबहादुर कार्कीले दुई दलका नेताहरूबीच भेटघाट जारी रहने बताएका छन्।

'समुन्नत लोकतन्त्रलाई अगाडि बढाउने हो भने बृहत् छलफल जरुरी छ। हाम्रो भेटघाटको क्रम जारी रहन्छ,' सञ्चारकर्मीहरुलाई छोटो प्रतिक्रिया दिँदै मन्त्री कार्कीले भने।

दुवै दलका नेताहरूबीच करिब २ घण्टा छलफल भएको हो। 

यस्तै बैठकमा सहभागी पूर्वपरराष्ट्रमन्त्रीसमेत रहेका एमालेका नेता प्रदीप ज्ञवालीले भने आजको बैठकमा सरकार तथा कांग्रेसका नेताहरूले ठोस प्रस्ताव नल्याएको दाबी गरे। 'आजको बैठकमा ठोस प्रस्ताव आएन। अर्को बैठकमा आउँछ कि,' ज्ञवालीले भने। 

छलफलमा लोकतन्त्र प्राप्तीका लागि लडेका शक्तिबीच सहकार्य हुनुपर्नेमा दुवै दल सहमत भएको भएपनि ठोस कुराकानीको विषय भने नेताहरुले खुलाएका छैनन्।