मोरङको लेटाङमा बालिकाको शव गाडेको अवस्थामा फेला

विराटनगर- दुई दिन देखि हराईरहेकी मोरङको लेटाङ-८ ज्यामिरेकी १२ बर्षीया करूणा राईको शव शुक्रबार विहान फेला परेको छ।

स्थानीय लालहिरा सामुदायिक वनभित्र बालिकाको शव गाडेको अवस्थामा फेला परेको मोरङ प्रहरीका प्रवक्ता डिएसपी मन्जिल मुकारूङले बताए। उनका अनुसार शव खाल्डो खनेर गाडिएको र नांगो अवस्थामा भेटिएको हो। 

विद्यालयबाट घर फर्किने क्रममा बुधबार दिउँसो ४ बजेतिर बालिका बेपत्ता भएकी थिइन्। जाँते माध्यमिक विद्यालयको कक्षा ६ मा अध्ययनरत बालिका बेपत्ता भएपछि खोजतलासका लागि परिवारका सदस्यले प्रहरीलाई आग्रह गरेका थिए। 

प्रहरीसहित खोजी गर्ने क्रममा खाल्डो खनेर गाडेर माथिबाट ढुंगाले छोपेको अवस्थामा सामुदायिक वन भित्र शव फेला परेको मुकारुङले जानकारी दिए। प्रहरीका अनुसार बालिकाको शरीरका विभिन्न भागमा चोट छ। बलात्कारपछि हत्या गरेर शव गाडिएको हुनसक्ने प्रहरीले आशंका गरेको छ। 

घटनामा संलग्न भएको आशंकामा एक वृद्धसहित दुई जना पुरुषलाई प्रहरीले नियन्त्रणमा लिएको जनाएको छ। बालिकाको बलात्कार गरि हत्या गरिएको भन्दै स्थानीयले केहीवेर प्रदर्शन र नारावाजी गरेका थिए।