प्रचण्डले देउवालाई सुनाए– एमसीसीमा गठबन्धनका अरू दल राजी भएनन्

काठमाडौं– सत्ता गठबन्धनमा एमसीसीबारे सहमति जुटाउने प्रधानमन्त्री शेरबहादुर देउवाको प्रयास असफल भएको छ। सत्ता साझेदार दलहरु नेकपा माओवादी केन्द्र र नेकपा एकीकृत समाजवादी आफ्नो अडानबाट पछि नहटेपछि देउवाको प्रयास असफल भएको हो। 

माओवादी अध्यक्ष प्रचण्डले अहिले प्रधानमन्त्री देउवालाई भेटेर एमसीसीमा सहमति जुट्न नसकेको बताएका छन्। त्यसअघि आफ्नो निवासमा उनले एकीकृत समाजवादीका अध्यक्ष माधवकुमार नेपाल, सोही पार्टीका नेता झलनाथ खनाल र जसपाका अध्यक्ष उपेन्द्र यादवबीच छलफल भएको थियो। उक्त बैठकको निर्णय प्रचण्डले बालुवाटार पुगेर देउवालाई सुनाएका हुन्।  

भेटमा प्रचण्डले तत्कालका लागि एमसीसीको संसदीय प्रक्रिया रोक्न प्रधानमन्त्री देउवासँग आग्रह गरेका थिए। देउवाले भने त्यसो गर्न नसकिने जवाफ दिएको बताइएको छ। 

बैठकमा सहभागी माओवादी केन्द्रका नेता देव गुरुङले पनि एमसीसीको विपक्षमा मतदान गर्नेबारे छलफल भएको बताए। उनले संसद्‍मा हुने एमसीसीको छलफलमा भाग लिने र त्यसको लागि सभामुखलाई संसद्‍मा भइरहेको अवरोधलाई हटाउनका लागि आग्रह गर्ने पनि बताए। सरकारले गत आइतबारको संसद् बैठकमा एमसीसी पेस गरिसकेको छ। आज दिउँसो १ बजे बस्ने अर्को बैठकमा एमसीसी छलफलका लागि प्रस्तुत गर्ने कार्यसूची छ।