प्रदेश १ : साढे ३ महिनापछि बोलाइयो प्रदेश सभाको बैठक बोलाइयो

विराटनगर- प्रदेश १ प्रदेशसभाको नवौं तथा हिउँदे अधिवेशन आगामी आइतबार बस्‍ने भएको छ। गत मंसिर १ गते मुख्यमन्त्री राजेन्द्र राईले विश्वासको मत पाएपछि स्थगित भएको बैठक साढे ३ महिना पछि बस्ने भएको हो।

प्रदेशसभा सचिव गोपालप्रसाद पराजुलीले नवौं हिउँदे अधिवेशनको सातौं बैठक फागुन १५ गते दिउँसो १ बजेका लागि बोलाइएको बताए।  सचिव पराजुलीका अनुसार त्यही दिन बिहान बस्ने कार्य व्यवस्था परामर्श समितिको बैठकले कार्यसूची तयार पारेपछि प्रदेशसभामा छलफल अघि बढाइने छ। उनले संसदमा विभिन्न तीन विधेयकको विषयमा समेत छलफल हुने बताए। प्रदेश सरकार आर्थिक तथा वित्तीय कार्यविधी, प्रदेश सरकार ऐन संशोधन विधेयक र प्रदेश अनुसन्धान प्रशिक्षण प्रतिष्ठान विधेयकमा छलफल हुने सचिव पराजुलीले बताए। 

प्रदेश सभाको बैठकमा प्रदेश नामाकरणको विषयमा साझा र सहमतिको प्रयास हुने आन्तरिक मामिला तथा कानुनमन्त्री केदार कार्कीले बताए। प्रदेश नामाकरणका लागि समन्वय तथा सहजीकरण गर्न स्वास्थ्य मन्त्री जयराम यादवलाई प्रदेश सरकारले जिम्मेवारी दिएको छ।