शिक्षा मन्त्रालय र शिक्षक महासंघबीच ५१ बुँदे प्रतिवेदन कार्यान्वयन गर्ने सहमति

काठमाडौं - शिक्षा विज्ञान तथा प्रविधि मन्त्रालय र नेपाल शिक्षक महासंघबीच ५१ बुंदे प्रतिवेदन कार्यान्वयन गर्ने सहमति भएको छ।

सोमबार शिक्षा मन्त्रालय र महासंघविच महानिर्देशक चुडामणि पौडेलको संयोजकत्वमा गठित कार्यदलले तयार पारेको ५१ बुँदे प्रतिवेदन कार्यान्वयन गर्ने सहमति भएको हो। नेपाल शिक्षक महासंघका सह अध्यक्ष पूर्णप्रसाद दवाडीसहितको गठित कार्यदलले मागहरूका सम्बन्धमा छलफल गरी आफूहरुको मागको विषय, वर्तमान अवस्था र गर्नुपर्ने कामहरूको कार्यसूची सहित तयार पारेको तालिकावद्ध ५१ बुँदे प्रतिवेदन मन्त्रालयलाई फागुन १ गते बुझाएको थियो।

शिक्षा मन्त्रालय र महासंघ बीच भएको सहमतिमा विगतमा विभिन्न समयमा मन्त्रालय र नेपाल शिक्षक महासंघ बीच भएका सहमति तथा समझदारी एवं नेपाल शिक्षक महासंघले नेपाल सरकार समक्ष गत वैशाखमा पेश गरेको ३४ बँदे मागपत्रको आधारमा तयार पारिएको प्रतिवेदन कार्यान्वयनमा सरकार सकारात्मक देखिएको छ।

मन्त्रालयमा पेश गरेको उक्त प्रतिवेदन कानून सम्मत ढङ्गले लागु गर्ने प्रतिवद्धताका साथ कार्यान्वयनमा लैजान दुवै पक्ष सहमत भएका हुन्।