ट्रक दुर्घटना हुँदा १२ जना घाइते

धनगढी- कैलालीमा ट्रक दुर्घटना हुँदा १२ जना घाइते भएका छन्। आइतबार बेलुकी जिल्लाको गौरीगंगा नगरपालिका-१० गणेश सामुदायिक वनस्थित हसुलिया बडैपुर सडकखण्डमा हसुलियाबाट धनगढी आउँदै गरेको सुपप्र ०१००१ क २०२७ नम्बरको मिनीट्रक पल्टिँदा १२ जना घाइते भएका छन्।

प्रदेश ट्राफिक प्रहरी कार्यालय अत्तरियाका अनुसार जोशीपुर गाउँपालिका-४ का ३४ वर्षीय गुलाब चौधरीले चलाएको उक्त ट्रक दुर्घटनामा ट्रकमा सवार गौरीगंगा-७ की ५५ वर्षीया रामकलीया चौधरी, ५० वर्षीया छडनी चौधरी, ५० वर्षकै कालीचरण चौधरी, ३३ वर्षीय रविन्द्र चौधरी र जनक चौधरी घाइते भएका छन्।

त्यस्तै, ५ वर्षीया भागरथी चौधरी, १२ वर्षीय सोम चौधरी, १७ वर्षीया ममता चौधरी, १५ वर्षीय अनिल चौधरी, २२ वर्षीय अर्जुन चौधरी, ३२ वर्षीया रंगीना चौधरी र जोशीपुर-३ का ३७ वर्षीय राजाराम चौधरी घाइते भएका छन्। उनीहरूको सौगात मेडिकल हल मसुरियामा उपचार भइरहेको र घाइते १२ जनामध्ये ५ जनालाई रिफर गरिएको बताइएको छ।

रामकलीया, कालीचरण, जनक, भागरथी र ममतालाई धनगढीस्थित निसर्ग अस्पतालमा रिफर गरिएको हो। ट्रक चालकले मापसे गरेको पाइएको र उनलाई इलाका प्रहरी कार्यालय मसुरियाले नियन्त्रणमा लिई थप अनुसन्धान गरिरहेको प्रहरीले जनाएको छ।